Polısııadaǵy reforma 173 mlrd teńge bólýden bastaldy

Elordalyq polısııa departamentinde quqyq qorǵaý organdarynyń aldyna qoıylyp otyrǵan mindetter men ony júzege asyrý barysy talqylandy, dep habarlaıdy Qamshy.kz aqparat agenttigi vedomstvonyń baspasóz qyzmetine silteme jasap.

Polısııa departamentiniń basshysy Erjan Sádenov vedomstvodaǵy jetekshiler men jeke quramǵa Joldaýǵa júktelgen turǵyndarmen tıimdi keri baılanys ornatý, azamattardyń quqyǵy men qaýipsizdigin qamtamasyz etý, polısııa qyzmetiniń abyroıyn arttyrý, halyqqa qyzmet kórsetý ortalyǵynyń qaǵıdatymen zamanaýı front-ofıs jasaý mindetterin tanystyrdy.

– Quqyq qorǵaý júıesin tolyqtaı reformalaý negizgi basymdyqtardyń biri bolyp otyr. Bolashaqta polısııa kúshtik qurylym obrazynan azamattarǵa qyzmet kórsetetin, olardyń qaýipsizdigin saqtaıtyn organǵa aınalady, – dedi Erjan Sádenov.

Departament basshysynyń aıtýynsha, polıseılerdiń tıimdiligi polısııa qyzmetiniń prestıjdiligine tikeleı baılanysty. Sondyqtan aldaǵy úsh jylda atalǵan salaǵa 173 mlrd teńge bólinbek. Qarajat eńbekaqyny kóterýge, páter jalǵa alýǵa, HQKO prınsıpi boıynsha qurylatyn front-ofıstardy qurýǵa jumsalmaq.