Almatyda alǵash ret Iskerlik keńes ótti

Búgin, 3 qyrkúıekte Almaty ákimi janyndaǵy Iskerlik keńestiń alǵashqy otyrysy jáne ShOB qoldaý sharalaryn talqylaǵan kásipkerlerdiń jyl saıynǵy V konferensııasy ótti.

Kezdesýge Almaty ákimi Baqytjan Saǵyntaev jáne «Atameken» UKP prezıdıýmynyń tóraǵasy Tımýr Qulybaev qatysty.

Almaty ákimi Baqytjan Saǵyntaev kásipkerlikke qoldaý kórsetý men ony damytý ákimdik jumysynyń strategııalyq basty baǵyttarynyń biri ekenin atap ótti.

«Búgingi kúni shaǵyn bıznes – jańa jumys oryndaryn qurýdyń basty draıveri, sondyqtan aýdandar ákimdikteri men qala basqarmalarynyń jumystary jergilikti jerlerde sapaly eńbekpen qamtý arqyly baǵalanatyn bolady», – dedi qala basshysy.

Negizgi maqsat – Almatyny Ortalyq Azııanyń bıznes-haby jasaý. Qalada ońtústik astananyń Azııanyń mańyzdy ekonomıkalyq jáne qarjy ortalyǵy, óńirler men álemniń ózge meapolısterimen básekege túse alatyn qalasy bolýy úshin barlyq jaǵdaılar jasalady. B. Saǵyntaev kásipkerlikti damytatyn «Almaty Bıznes 2025» biryńǵaı óńirlik baǵdarlamanyń jasalǵanyn habarlady. Ol negizgi bes baǵyttan turady, ákimshilik kedergilerdi azaıtý, bıznesti qarjylandyrýdy ulǵaıtý, óndiris, servıs jáne saýda úshin ınfraqurylymdy damytý, kásipkerlik negizderin oqytý jáne ınvestısııalyq jobalardy keshendi júrgizý syndy máselelerdi qamtyǵan.

Baǵdarlama tetikteri eń aldymen shaǵyn bıznesti jáne isin jańa bastaǵan kásipkerlerdi qoldaýǵa, jas azamattardyń jeke tulǵa retinde qalyptasýyna jaǵdaı jasaýǵa baǵyttalǵan.

Kezdesý barysynda kásipkerler bıznesti damytý jóninde usynystaryn aıtty. Mysaly, «Red Dragon Almaty» JShS quryltaıshysy Konstantın Avershın saýda obektileri men kólik arqyly qyzmet kórsetetinderdiń jumysyn retteý úshin normatıvti-quqyqtyq aktiler ázirleýdi usyndy. Ol qujatty ázirleıtin jumysshy tobynyń quramyna isker bıznesmenderdiń enýi tıis ekenin aıtty.

«Jalaıyr» JShS kompanııasy tobynyń bas dırektory Artýr Kotenıov EDB men PNQ-da kepilde turǵan paıdalanylmaǵan jerlerdi aınalymǵa shyǵarý mehanızmin ázirleýdi usyndy. Kásipkerdiń pikirinshe, bul bos jer ýchaskeleriniń tapshylyǵyn joıýǵa yqpal etedi.

Jeńil ónerkásipke, ásirese Made in Kazakhstan brendi boıynsha kıim shyǵaratyn kásipkerlerge qoldaý kórsetý qajet ekendigi sóz boldy. Kásipkerler jer qatynastary salasynyń jumysyn jaqsartýdy ótindi.

almaty.gov.kz