• USD 468.56

  • EUR 497.56

  • RUB 7.3

  • CNY 67.18

29 Naýryz, 08:38:14
Almaty
+35°

Búgin, 5 qyrkúıekte Almatyda QR Prezıdenti Qasym-Jomart Toqaevtyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Qazaqstan halqyna Joldaýynyń negizgi qaǵıdalaryn júzege asyrý máselelerine arnalǵan qala aktıviniń jıyny ótti.

Almaty ákimi Joldaýda kórinis tapqan bes baǵytty jáne belgilengen mindetterdi oryndaý úshin naqtyly sharalardyń júzege asatynyn aıtty.

Ol óziniń sózinde azamattardyń qala ákimdigine jibergen ótinishteriniń qatań baqylaýǵa alynatynyn jáne zań sheńberinde sheshiletinin jetkizdi. Azamattardyń barlyq konstrýktıvti saýaldaryna jedel ári naqtyly nazar aýdaratyn «Tyńdaı alatyn memleket» konsepsııasyn iske asatyn bolady.

«Biz jumysty bastap kettik. Barlyq basqarma basshylary men aýdandar ákimderi áleýmettik jelilerde akkaýnttar ashty, osy arqyly olar almatylyqtardan tikeleı «keri baılanysty» qabyldaı alady. Basqarmalar men aýdan ákimdikterinde eki aptada bir ret «Ashyq esik kúnderi» ótýde. Nazar aýdarylmaǵan árbir ótinish úshin birinshi basshylar jeke jaýapqa tartylady. Kadrlyq sheshimder eń aldymen olardyń turǵyndarmen jumysynyń baǵasyna qatysty qabyldanady», – dedi Almaty ákimi.

Budan ózge, qalada zań sheńberinen shyqpaıtyn jáne azamattar tynyshtyǵyn buzbaıtyn beıbit aksııalar ótkizý úshin jańa oryndar qarastyrylady.

Memleket basshysynyń tapsyrmasy boıynsha qalada quqyq qorǵaý júıesin reformalaý jalǵasýda. 2020 jyly vıdeomonıtorıng júıesi engiziledi, sonyń arqasynda adamdar kóp jınalatyn oryndarǵa monıtorıng pen vıdeosaraptama júrgiziledi jáne qalanyń barlyq basty obektileri qamtylady. Bul – qoǵamdyq qaýipsizdikti qamtamasyz etýdegi mańyzdy tetikterdiń biri. «E-Qylmysty is» jáne «Ákimshilik óndiristiń biryńǵaı reestri» jobalary engizildi. Ashyqtyqty qamtamasyz etý úshin polısııa departamenti sıfrly sheshimderdi qoldanýdy qamtamasyz etedi.

Keler jyldyń aıaǵyna deıin 112-niń biryńǵaı shuǵyl qyzmeti engiziledi. Budan ózge, polısııa jumysynyń ashyqtyǵyn qamtamasyz etý úshin qalanyń barlyq aýdandarynda 11 front-ofıster ashylady. Munda kelýshilerge HQKO prınsıpi boıynsha jaıly jaǵdaıda qyzmetter kórsetiledi.

Bıylǵy jyly sel qaýipin tómendetý úshin Kishi jáne Úlken Almaty, Qarǵaly jáne Aqsaı ózenderiniń basseınderinde monıtorıng júrgizetin 10 avtomattandyrylǵan stansııalardyń qurylystary bastaldy.

Bulardan ózge, Almaty ákimi kásipkerlikti damytýdyń naqtyly sharalaryn aıtty. Eń aldymen, mádenıet, týrızm, kólik, logıstıka jáne IT ınnovasııa salalarynda kásipkerlikti damytýǵa nazar aýdarylady. Otbasylyq bıznesti, sonyń ishinde kópbalaly otbasylarda praktıkany damytýǵa erekshe mán beriledi. Sondyqtan, Almatyda «Baqytty otbasy» kópbalaly otbasylardy qoldaý ortalyǵynda áıelderdi kásipkerlikke úıretetin «Isker Ana» baǵdarlamasy qolǵa alyndy.

Jyl aıaǵyna deıin múmkindigi shekteýli jandar úshin olardyń jumys oryndarynda tálimgerlik pen tájirıbe jınaqtaý ortalyǵyn ashý josparlanǵan.

Kásipkerlikke jaǵdaı jasaý jáne ákimshilik kedergilerdi azaıtý maqsatynda Almatyda alty aýdanda fılıaldary bar «Qoldaý» kásipkerlik ortalyǵy quryldy. Munda barlyq memorgandardyń, damý ınstıtýttary men monopolısterdiń mamandary qyzmet kórsetetin bolady. Bul sharalar qyzmet kórsetý ýaqytyn qysqartyp, qoljetimdilikti qamtamasyz etýde. Búgingi kúni Almatyda ShOB sýbektileriniń sany 185 myń. Olar IJО́ 40%-yn, salyqtyń 64%-yn qamtamasyz etedi, 600 myńnan astam jumys oryndary qurylǵan.

Bulardan ózge, Baqytjan Saǵyntaev qalanyń týrıstik áleýetin damytý qajettigin atap ótti.

Týrıstik klasterdi damytý týraly sóz qozǵaǵan ákim aǵymdaǵy kýrorttardy nazarǵa alýdy, bulardaǵy kólik, turý, tamaqtaný, jaıly jaǵdaı jasaý máselelerin retke keltirýdi qadap turyp aıtty.

Almaty týrıster úshin taý shańǵysy bazalarymen ǵana tartymdy bolmaýy tıis.

«Iskerlik, mádenıet, sport týrızmin damytqan jón. Munymen kún saıyn jáne barlyq baǵyttar boıynsha jumys jasaý kerek. Sonda ǵana biz týrısterdiń tek taýlarymyzdy kórý úshin ǵana kelmegenderin sezinetin bolamyz», – dedi B.Saǵyntaev.

Bulardan ózge, megapolıs basshysy Almatyda sıfrlandyrý máselesi boıynsha basqarma qurylatynyn habarlady. Jańa basqarmanyń mindeti – keler jyldyń aıaǵyna deıin qajetti memqyzmetterdi tolyq avtomattandyrý.

Almaty – Qazaqstannyń sıfrly astanasy. Qazirgi kezde qala sıfrlyq saýattylyq deńgeıi boıynsha (82,6%) úzdik. IT qyzmettiń úshten biri ońtústik astanada oryndalady. Astanamen birge Almatyda málimetterdi jedel jiberýdiń jańa formaty – 5G testilenýde.

«Meniń tapsyrmam boıynsha ákimdikte sıfrlandyrý máselesi boıynsha jeke basqarma qurylady. Onyń mindeti – aqyldy qalalardyń jańa jobalaryn engizý, memlekettik qyzmetterdi avtomattandyrýdy aıaqtaý, Almatyda IT sektor qarqynyn jyl saıyn jedeldetý úshin jaǵdaılar jasaý», – dep atap ótti B. Saǵyntaev.

Qazirgi kezde Almatyda qajetti memqyzmetterdiń 80%-y avtomattandyrylǵan. Jańa sıfrlandyrý basqarmasynyń mindeti – 2020 jyldyń aıaǵyna deıin qajettiliktegi memqyzmetterdi tolyq avtomattandyrý.

Qala aktıviniń otyrysy barysynda megapolıs basshysy medmekemelerdi materıaldyq-tehnıkalyq jaraqtandyrý boıynsha júrgizilgen aýdıttiń nátıjesi týraly habarlady. Qazirgi kezde qalanyń emhanalaryn jaraqtandyrý aıyrmashylyǵy 20%-dan 80%-ǵa deıin. Qalada medmekemelerdi jaraqtandyrýdyń 3 jyldyq jospary jasaldy. Meduıymdarda 30 myńnan astam medısınalyq qondyrǵylar bar, olardyń 10,9 myń birliginiń tozyǵy jetken.

Sondyqtan, medquraldardy satyp alý úshin 86 mlrd. teńgeden astam qarjy bólý josparlanǵan. 2020 jyldyń ózinde 1,4 myń birlik medtehnıka alynady. Jedel medkómek qyzmeti úshin keler jyly 80 avtomobıl satyp alynady.

Shuǵyl kardıologııalyq kómek úshin qalanyń №4,7 jáne OQKA sııaqty úsh stasıonarynda kardıobólimder ashý josparlanǵan. 2019 jyldyń qazanynda Alataý aýdanynda Jedel medısınalyq kómek qyzmetiniń jańa qosalqy stansııasy iske qosylady. Barlyq aýdandarda 35 otbasyly-dárigerlik ambýlatorııalar ashylatyn bolady.

Jıyn sońynda B. Saǵyntaev Memleket basshysynyń Qazaqstan halqyna Joldaýynda aldaǵy bolashaqta júzege asýy tıis bes mańyzdy mindetterdiń kórinis tapqanyn eske saldy. Joldaýdyń basty maqsaty – halyqtyń ómir súrý sapasyn jaqsartý.

Qala aktıviniń otyrysynda qalalyq máslıhat depýtattary, qoǵamdyq keńes músheleri, zııaly qaýym men qoǵamdyq uıymdar ókilderi Joldaýdaǵy alǵa qoıylǵan mindetter týraly aıtty jáne baǵdarlamalyq qujattyń negizgi qaǵıdalaryn júzege asyrýdaǵy ózderiniń pikirlerin bildirdi.

almaty.gov.kz

 
"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir