Jambyl oblysynyń shekarasy 1091 gektar aýmaqqa ulǵaıdy.

Jyl basynda Almaty oblysynyń shekarasyn ózgertý týraly Úkimet Qaýlysyna qol qoıyldy. Atalǵan Qaýlyǵa saı buǵan deıin Almaty oblysynyń ákimshilik aýmaǵy sanalyp kelgen QR Qorǵanys mınıstrliginiń aýdandyq gvardııalyq eksplýatasııalyq bólimi, Bıologııalyq qaýipsizdik problemalaryn ǵylymı-zertteý ınstıtýty syndy nysandar men burynǵy «Almaty» áskerı keńshary endi Jambyl oblysynyń menshigine ótedi, dep jazady Qamshy.kz aqparat agenttigi. 

Eń bastysy atalǵan aýmaq turǵyndary endi memlekettik qyzmet túrlerin alý úshin 150 shaqyrym jerdegi Uzynaǵash aýylyna sabylmaı, irgedegi Otardan-aq sharýasyn tyndyrady. Jergilikti bılikke ákimshilik-aýmaqty ózgertý týraly talapty turǵyndar toǵyz jyldan beri qoıyp kelgen. Alaıda ártúrli sebeptermen keıingi qaldyrylyp kelgen másele osylaısha oń sheshimin tapty. Oǵan qosa kúni búginge deıin «Mátibulaq» polıgonynda ótetin halyqaralyq deńgeıdegi áskerı oqý-jattyǵý jıyndarynyń keı shyǵyndaryna bizdiń óńir qazynasynan qarjy jumsalyp kelgen edi.

–Rasynda jergilikti turǵyndar tarapynan ákimshilik-aýmaqty ózgertý týraly ótkir máseleler kóterilip keldi. Jańadan qabyldanǵan aýmaq buǵan deıin Almaty oblysy, Jambyl aýdanyna qaraǵan. Demek turǵyndarǵa memlekettik qyzmet alýda, dáriger kómegine júginýde 150 shaqyrym qashyqtyqtaǵy aýdan ortalyǵy Uzynaǵash aýylyna barýǵa týra kelgen. Oǵan qosa «Mátibulaq» polıgonynda áskerı oıyndardy ótkizý kezinde áskerı nysan aýmaǵyn ınfraqurylymdarmen jabdyqtaý isi buǵan deıin Jambyl oblysy bıýdjeti esebinen júrgizildi. Sonymen qatar osy áskerı keshendegi áskerı qyzmetkerlerdiń 80 paıyzy kelisim shartpen jumys jasap jatyr. Olardyń kóbi otbasyly. Sondyqtan munda balabaqsha oryndarynyń tapshylyǵy, mekteptiń tarlyǵy syndy máseleler de qalyptasqan. Atalǵan jaıttardy eskerip biz «Qazaqstan Respýblıkasynyń ákimshilik-aýmaqtyq qurylysy týraly» Zańyn basshylyqqa alyp Almaty oblysynyń ákimdigine qaıyryldyq. Bizdiń bul usynysymyzdy Almaty oblysy ákimdigi men máslıhatynyń birlesken sheshimimen qabyldandy, –deıdi oblys ákimdiginiń jer qatynastary basqarmasy basshysynyń orynbasary Berdibek Moldabaı.

Endi eki oblystyń ókilderi berilgen jerdi ótkizý, qabyldap alý rásimderin ótkizedi.