Qyz tárbıesi – ult erteńi

Jambyl oblysy ákimdigi bilim basqarmasynyń memlekettik áleýmettik tapsyrysy sheńberinde «Qyz balalar arasynda ınabattylyq pen tán salaýattylyǵyn qalyptastyrý» taqyrybyndaǵy áleýmettik joba aıasynda «Asyl Arman» ulttyq dástúr men ónerdi qoldaý» qoǵamdyq birlestigi Jambyl, Merki aýdandary men Taraz qalasynda «Erte nekeniń erteńi kúmándi» atty kezdesý uıymdastyrdy.

– Qazaq otbasynda basqa ulttarǵa qaraǵanda, qyz bala tárbıesine erekshe mán berip, qyz balany ardaqtap ustap, kóńilin qaldyrmastan, oǵan qarsy sóılemeı, mápelep ósirýmen qatar qatal ustap, durys tárbıe alýyna erekshe kóńil bólip otyrǵany belgili. Qashanda «qyz» degen sózdiń ózin ádemiliktiń, ınabattylyqtyń, sulýlyqtyń,náziktiktiń, sypaıylyqtyń belgisi dep tanyǵan.

Qazirgi kúni tárbıeni ata-anasynan emes, teledıdar, kompıýterden alyp kele jatqan jastar býyny qalyptasýy osy qasıetterdiń saqtalmaýyna birden-bir sebep. Naryqtyq zaman kelgeli keıbir ata-ananyń balasymen aralasýǵa da ýaqyty joqtyń qasy desek bolady. Osydan baryp qyz bala áke-sheshesinen sýyp, olarǵa degen syılastyqtan múldem qalady. Uly dalanyń dana qyzdarynyń qolynda kemel keleshek pen jarqyn bolashaq tur desek, olardyń óz halqyn súıe bilýi, boıynda ulttyq rýh pen namys bolýy erteńgi kúnge degen senim týǵyzady. Jas qyzdarymyz – talshybyq sııaqty. Ony aıalap-mápeleseń, báıterek bolyp óseri anyq. Búgingi qyz – erteńgi ana,ol anaǵa qarap ósip, boı túzeıtindikten otbasy tárbıesi durys bolsa, qyzdarymyzdyń da adaspasy haq, – deıdi kezdesýlerdiń uıymdastyrýshysy, «Asyl Arman» ulttyq dástúr men ónerdi qoldaý» qoǵamdyq birlestiginiń jetekshisi Rınat Nuraqbaev.

Halqymyz «Qyzǵa qyryq úıden tyıý, qala berse qara kúńnen tyıý» degen maqalǵa qanshama fılosofııalyq oı syıǵyzǵan. Iаǵnı qyz bala tárbıesine tek qana anasy ǵana jaýapty emes, búkil aýyl, rý, qoǵam jaýapty bolyp otyr. Qyzdarymyz sanaly da tárbıeli bolyp ósse, tereń bilim alsa, joǵaryda aıtylǵan óreli mindet bıiginen kórineri sózsiz.Sol sebepti ulttyń uıaty, halyqtyń shyraıy bolǵan árbir qyz balaǵa ata-anasyn, týystaryn, ustazyn syılap, qadirleı bilýdi úıretsek, bolashaqta odan elin, jerin, halqyn súıetin, óz shańyraǵyn ardaqtaıtyn, balalaryn janyndaı jaqsy kóretin qamqor ana, qaıratty jan, názik arý shyǵary sózsiz.