Jambylda bitispes daý bıler keńesinde sheshiledi

Jambylda el arasyndaǵy daý-damaıdy sheshýdegi oblystyq ardagerler keńesi janynan qurylǵan bıler keńesiniń yqpaly zor. Qurylǵannan bergi aralyqta bıler keńesi 82 daýly máseleniń túıinin taýyp, qos taraptyń tatýlasýyna muryndyq bolǵan, dep jazady Qamshy.kz aqparat agenttigi. 

Elbasynyń Joǵary Sotqa el arasyndaǵy irili-usaqty daý-damaıdy sotqa jetkizbeı sheshý tájirıbesin engizý tapsyrmasyna oraı jergilikti jerlerde aqsaqaldar uıymynyń bastamasymen bıler keńesi quryldy. Jambyl oblystyq ardagerrler keńesi janynan qurylǵan osynaý keńeske qazir 7 adam múshelikke ótken. Sondaı-aq Taraz qalasymen birge 5 aýdanda osy tájirıbeni keńinen qoldanysqa engizgen. Aýdandyq deńgeıde bıler keńesiniń quramy 5 adamnan tursa, aýyldyq okrýgtegi daý-damaıdy sheshý 3 adamnan turatyn bıler keńesiniń enshisine tıedi. Qazir oblys aýmaǵynda jalpy sany 518 bı daý-damaıdy sotqa deıin jetkizbeı sheshýge bar kúsh jigerin jumsaýda.

–Negizinen bıler keńesiniń quramyna elge syıly, aýyzy dýaly aqsaqaldar men qarııalar saılanady. Olardyń bilim-biligin únemi jetildirip otyrýy basty nazarda. Bilimin kásibı deńgeıde shyńdaǵan medıatorlarǵa arnaıy sertıfıkattar tabys etildi. Qazirgi tańda oblystyq ardagerler keńesi janyndaǵy bıler keńesi Ardagerler ortalyǵy ǵımaratynda jumys jasaıdy. Olarǵa arnap «Medıasııa –bitimgershilikke ákeletin jol» dep atalatyn arnaıy burysh ta uıymdastyrylǵan. Bıler keńesiniń jumysyn jetildirý maqsatynda jýyrda oblystyq sot pen ardagerler keńesi arasynda yntymaqtastyq týraly memorandýmǵa qol qoıyldy. Osy memorandým arqyly bıler ınstıtýtynyń rólin nyǵaıtyp, «Medıasııa týraly» zańnyń sheńberinde aýyl-aımaq, kórshi-qolań, aǵaıyn-týys arasyndaǵy daýdy retteýdiń tetigi qarastyrylmaq,–deıdi oblystyq ardagerler keńesi janyndaǵy bıler keńesiniń tóraǵasy Ońlasyn Esirkepov.

О́z jumysyn bastaǵannan beri el arasynda irili-usaqty 82 daýdyń túıinin sotqa jetkizbeı tarqatyp bergen bitimgerler jyl basynan bergi aralyqty birneshe aryz-shaǵymdy qarap tıisti sheshimder shyǵarǵan. Ásirese, Talas, Jambyl aýdandaryndaǵy bıler keńesiniń belsendiligin erekshe atap ótken jón. Rasynda qazaq qoǵamynda kezinde daý-janjaldyń qaı-qaısysyn bolmasyn jalǵyz aýyz sózben sheship, qos tarapty tatýlastyrý bılerge júktelgen mindet bolatyn. Jambyldyq qarııalardyń áreketine qarap osy bir ozyq dástúrdi zaman aǵymyna saı beıimdeýden utarymyz kóp bolatyndyǵyn baǵamdaı berýge bolady.