Jambyldyq jasóspirimder kórpe kóktep, quraq quraýǵa áýes

Jambyl oblysynyń Jambyl aýdanyndaǵy úıirme balalardy quraq kórpe tigýge baýlýda. «Aınalaıyn» dep atalatyn óner ortalyǵynda búginde 200-den astam bala horeografııa, aǵylshyn tili, eriktiler klýby, teatr, qorshaǵan orta, kesteleý, dızaın, balalar kitaphanasy,fotoklýb baǵytyndaǵy jumys jasaıtyn úıirmelerge belsene tartylǵan, dep jazady Qamshy.kz aqparat agenttigi. 

Elbasynyń «Uly Dalanyń jeti qyry» baǵdarlamalyq maqalasynda qazaq halqynyń erteden órkenıettiń ozyq úlgisimen etene tanys bolǵandyǵy aıtylady. Ári ony kóshpendiler ómirinde ońtaıly paıdalanýdyń ádisin jetildirgen de qazaqtar ekeni ámbege aıan. Bir ǵana kıiz basý, kıiz úı tigý kóshpendiler ómiriniń ajyramas bóligi sanalady. Ári bul ádispen tigilgen úılerdiń túrli tehnogendik apattarǵa tózimdi ekenin de ýaqyt óte dáleldendi. Sondyqtan da osy bir ıgi dástúrdi urpaq sanasynda jańǵyrtýdyń bereri mol bolmaq. Bul jumysqa 2004 jyly Jambyl oblysynyń Jambyl aýdanynda Aıgúl Razaqovanyń bastamasymen qurylǵan «Aınalaıyn» balalar men jasóspirimder ortalyǵy aýqymdy jumys atqaryp keledi. Qazir bul ortalyqta balardyń qarym-qabiletine qaraı 9 túrli úıirme jumys jasaýda. Jaz aılarynda ortalyq janyna shaǵyn lager qurylady. Ortalyq ta kıiz úı jasaý, qyz jasaýyn ázirleý, balalarǵa arnalǵan ulttyq naqyshtaǵy áshekeılerdi tigiledi. Mine osy jumysqa belsene at salysatyn jambyldyq órender kórpe-jastyqtar, ydystar men dorbalar,qorjyndardy óz qolymen ázirleıdi. Ortalyq jetekshisi Aıgúl Razaqova bul bastamanyń balalardyń ulttyq qundylyqtardy tanyp bilýdegi róliniń erekshe ekenin aıtady.

–Ulttyq naqyshtaǵy kórpe-jastyqtardy, kádesyılardy tigý jumystaryna qatysý balalardyń qolónerge qushtarlyǵyn arttyrady. Odan soń osy tehnologııalar arqyly olar ata-babamyzdyń san ǵasyr turmys-tirshiligimen etene tanysyp, salt-dástúr, ádep-ǵurypqa jaqyn bolady. Ortalyqta balalardyń qolymen ázirlengen buıymdar sheteldik týrıster men jergilikti turǵyndar arasynda suranysqa ıe. Buıymdardy satýdan túsken paıda qaıyrymdylyq aksııalar men aqysyz úıirmelerdi uıymdastyrýǵa jumsalady. Qazirdiń ózinde bizdiń balalardyń qolynan shyqqan buıymdar óńirdegi qymyzhanalardyń ajaryn ashyp tur,–deıdi A.Razaqova.