"Mereıli otbasylar» marapattaldy

Otbasy kúni merekesi qarsańynda Qazaqstan Respýblıkasy Premer-Mınıstriniń orynbasary Berdibek Saparbaevtyń qatysýymen jyl saıynǵy "Mereıli otbasy" ulttyq konkýrsynyń jeńimpazdaryn marapattaý rásimi ótti, dep habarlaıdy Qamshy.kz aqparat agenttigi. 

Sharaǵa sondaı-aq QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Gúlshara Ábdiqalyqova, QR Parlamentiniń depýtattary, memlekettik organdardyń, ÚEU jáne BAQ ókilderi qatysty.

"Mereıli otbasy" ulttyq konkýrsy Elbasynyń bastamasymen 2013 jyly bekitilgen. Konkýrsty ótkizýdiń maqsaty – otbasy ınstıtýtyn nyǵaıtý, otbasylyq jáne rýhanı-adamgershilik qundylyqtardy nasıhattaý, erli-zaıyptylardyń, ata-analardyń balalar tárbıesindegi jaýapkershiligin arttyrý, qart ata-analarǵa qamqorlyq jasaý.

Is-sharany ashqan B.Saparbaev marapattaý rásimine qatysýshylarǵa arnalǵan Qazaqstan Respýblıkasynyń Prezıdenti Q.K.Toqaevtyń quttyqtaý sózin oqyp berdi. "Bul memlekettik is-shara – Qazaqstannyń áleýmettik saıasatynyń mańyzdy bóligi. Elimizde jyl saıyn halyqtyń ómir súrý jaǵdaıy men turmys sapasyn jaqsartýǵa baǵyttalǵan mańyzdy sheshimder qabyldanýda. Osyǵan baılanysty elimizdiń merekeler kúntizbesine "Otbasy kúni" meıramy engizildi. Sondaı-aq yrys-berekesi men yntymaǵy jarasqan máýeli áýletterdi nasıhattaıtyn "Mereıli otbasy" ulttyq baıqaýyn ótkizý dástúrge aınaldy. "Mereıli otbasy" dástúrli ulttyq konkýrsynyń jeńimpazdary otansúıgishtik, eńbekqorlyq, meıirimdilik sııaqty úlgi tutarlyq ómirlik ustanymdardy jan-jaqty meńgergenin kórsetti", delingen quttyqtaýda.

Saltanatty is-sharada Premer-Mınıstrdiń orynbasary B.Saparbaev jáne Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy G.Ábdiqalyqova 17 fınalıst-otbasyǵa dıplomdar jáne turmystyq tehnıka satyp alýǵa Qazaqstan Respýblıkasynyń Birinshi Prezıdenti – Elbasy Qorynyń atynan sertıfıkattar tabys etti.

Alty jylda konkýrsqa 15 197 otbasy qatysty. Qatysýshylardyń jalpy sanynyń 62% – aýyldyq jerlerden otbasylar, 36% – kópbalaly otbasylar, 18% – jas otbasylar, 17% – eńbek áýletteriniń ókilderi. Qatysýshylardyń sany jylsaıyn ósýde. 2014 j. konkýrsqa 1 298 otbasy qatyssa, bıylǵy jyly olardyń sany 2,5 ese kóp.

Jeńimpaz otbasy 30 tamyzdan 6 qyrkúıekke deıin ótkizilgen sms/ınternet arqyly daýys berý qorytyndysy boıynsha anyqtaldy. 2019 jylǵy "Mereıli otbasy" ulttyq konkýrsynyń laýreaty bolyp Atyraý oblysynan Tilekqabylovtar otbasy atandy.

Premer-Mınıstrdiń orynbasary jeńimpaz otbasyǵa estelik músinshe men shaǵyn avtobýstyń kiltin tapsyrdy. Marapattaý rásimi qazaqstandyq tanymal estrada ártisteriniń  qatysýymen ótken merekelik konsertpen aıaqtaldy.