Tarazda Myrzataı Joldasbekovpen kezdesý ótti

Búgin Jambyl oblysy ákimdigi mádenıet, arhıvter jáne qujattama basqarmasynyń uıymdastyrýymen  Sh.Ýálıhanov atyndaǵy oblystyq ǵylymı-ámbebap kitaphanasynda QR Memleket qaıratkeri, fılologııa ǵylymynyń doktory, professor Myrzataı Joldasbekovpen kezdesý ótti.

Táýelsiz memleket ornatýda, ony qalyptastyrýdaǵy jáne túriktaný ǵylymy men qazaqtyń tól ónerin damytýdaǵy eńbegi zor Alashtyń abyzymen bolǵan kezdesýde Jambyl oblysynyń 80 jyldyǵyna oraı jaryq kóretin kóptomdyqtyń daıyndalý barysy áńgime arqaýyna aınaldy.  Oblystyń tereń tarıhy jan-jaqty qamtylatyn eńbekti shyǵarýda eskerýge tıis máselelerdi ortaǵa salǵan ult zııalysy kezdesý barysynda eldiń keleshegi, tarıhy, jas urpaqtyń jarqyn bolashaǵy týrasyndaǵy keleli áńgimelerin ortaǵa saldy.

Oblystyq memlekettik arhıvtiń muraǵattanýshysy Maqulbek Rysdáýlettiń aıtýynsha oblys ákimi Asqar Myrzahmetovtiń bastamasymen daıyndalyp jatqan 80 tomdyq kitaptyń 30 tomy daıyndalyp, baspaǵa jiberilgen. Qalǵan tomdary da qazan aıyna deıin ıaǵnı oblystyń 80 jyldyq mereıtoıyna deıin daıyn bolmaq.

Myrzataı Joldasbekov kóptomdyqty ázirleý barysynda asyǵystyqqa jol berýge bolmaıtynyn, asqan jaýapkershilikpen qaraý ekenin jetkizdi.

– Asqar Myrzahmetov Ońtústik Qazaqstan oblysynda ákim bolyp turǵanda "Qazynaly Ońtústik" degen kitapty shyǵarýǵa uıytqy bolyp, ıgi is jasady. Sebebi urpaq eldiń, óńirdiń tarıhyn, óziniń túp tamyryn bilip júrýi tıis. Sondyqtan sizderdiń de jasap jatqandaryńyz alǵys aıtýǵa, qurmet kórsetýge turarlyq izgilikti is.

Biraq asyqpaý kerek. Jan-jaqty saralap, jeti ret ólshep, bir ret kesken jón. Málimettterdiń burmalanbaýyna nazar aýdaryńyzdar. Bilmegendi suraýdyń eshqandaı da sókettigi joq. Bilmegenderińiz bolsa aqyl-keńes aıtyp, kórgen-túıgenimmen,  qolymda bar derektermen bólisýge daıynmyn, – degen Myrzataı Joldasbekov óziniń birqatar qundy eńbekterin Sh.Ýálıhanov atyndaǵy oblystyq ǵylymı-ámbebap kitaphanasynyń qoryna syıǵa tartý etti.

Aıta keteıik, M. Joldasbekov ár jyldary Qazaqstan Respýblıkasy Premer-mınıstriniń orynbasary, Qazaqstan Respýblıkasynyń Iran Islam Respýblıkasyndaǵy Tótenshe jáne ókiletti elshisi, Qazaqstan Respýblıkasy Syrtqy ister mınıstri janyndaǵy Dıplomatııalyq akademııanyń rektory qyzmetterin atqardy. 2000 jyldan Astanadaǵy Eýrazııa ulttyq ýnıversıtetiniń rektory. Joldasbekov qazaq ádebıetiniń alǵashqy qaınar bastaýlaryn, Jambyl Jabaev shyǵarmashylyǵyn zertteýge mol úles qosty. Túrik qaǵanaty kezindegi Orhon-Enıseı jazba eskertkishterin qazaq ǵalymdary arasynda alǵashqylardyń biri bolyp jańasha zerdelep, qazaq tilindegi aýdarmasyn ǵylymı aınalymǵa engizdi. Jambyldyń aqyndyq mektebin zerttep, onyń tustastary men shákirtteriniń týyndylaryn jan-jaqty taldady. “Halyqtar dostyǵy”, “Qurmet” ordenderimen marapattalǵan.