"Erkem-aı" óner mektebi qanat qaqty

QR Konstıtýsııasy kúni men Jastar jylyna oraı Taraz qalasynda «Erkem-aı» jańa óner mektebi ashyldy. Merekege kúni ortalyqtyń lentasy saltanytty túrde qıylyp, balalarǵa bazarlyq syılady dep jazady Qamshy.kz aqparat agenttigi. 

Jalpy mádenıet oshaǵynyń dırektory Saltanat Qultaevanyń aıtýynsha, atalǵan óner mektebiniń jastarǵa bereri mol eken.

- Taraz topyraǵy talaı talanttardy týdyrǵany belgili. Jastar jylynda biz osy ónerli jastarǵa barynsha qoldaý bildirgimiz kelip otyr. Zamanaýı qurylǵylarmen jabdyqtalǵan ortalyqta balalarǵa án, bı, sýret, dombyra jáne fortepıano úıirmeleri qyzmet kórsetetin bolady. Biz jastardyń ónerin ushtap ǵana qoımaı, olardyń túrli baıqaýlarda baq synaýyna múmkindik týǵyzyp, jolyn ashamyz. Sondyqtan barlyqtaryńyzdy «Erkem-aı» óner mektebine kelýge shaqyramyn, -deıdi S.Qultaeva.

Jalpy ortalyqtyń basty ereksheligi – munda baǵa qoljetimdi. Jáne qazir mektep basshylyǵy demeýshilerdi tartý arqyly múmkindigi shekteýli jáne kópbalaly otbasylarynan shyqqan balǵyndardy tegin oqytý jaǵyn qarastyrýda. Taǵy bir aıta keterligi, eger «Erkem-aı» óner mektebine balańyz eki úıirmege jazylatyn bolsa, sabaqtar arasynda tegin tamaqtandyrý qamtamasyz etilgen. Sondaı-aq munda eń bilikti mamandar dáris berýde.

Bir sózben aıtqanda Jastar jylyna oraı ashylǵan óner mektebiniń balalarǵa bereri mol bolyp tur. Endeshe, «Erkem-aıǵa» asyǵyńyz, aǵaıyn!

Jalpy mundaı óner mektepteri kóptep ashylǵany qýantady. Sebebi «Rýhanı jańǵyrýǵa» bet alǵan memleketimiz úshin rýhanı azyq bolar dúnıelerdiń kóptep bolǵany quptarlyq. Oǵan qosa, bul óskelek urpaq úshin de mol qazynaǵa, keleshekke arzymas azyq.

«Erkem-aı» óner mektebiniń ómirsheńdigine biz de kámil senemiz. Sebebi munda balalar túrli úıirmelerden ónerlerin shyńdap ǵana qoımaı, dýy basym básekeler men baıqaýlarǵa qatysyp, oblys namysyn asqaqtatqaly tur. Al sol balǵyndardyń ishinen erteń álemge tanymal ánshi, kúıshi, dombyrashy, bálkim bıshi shyqpasyna kim kepil. Sondyqtan qanatyn keńge qaqqan «Erkem-aı» óner ortalyǵynyń jumysyna tek sáttilik tileıik. Ushar shyńyń, alar asýyń, kórer bıigiń kóp bolǵaı – «Erkem-aı»!

Balǵyn balalardy shyńdap, týma talanttardy tanytarda tulparyńnyń tuıaǵy, suńqaryńnyń qanaty talmasyn!