Bınazar batyr beıitine bet túzeıtinder kóp

Jambyl oblysynda «Bolashaqqa baǵdar: rýhanı jańǵyrý» baǵdarlamasy aıasynda qolǵa alynǵan «Qazaqstannyń kıeli jerleri» jobasynyń óńirlik balamasyna negizinen el taǵdyry úshin aıanbaı eńbek etip, urpaq jadynda qalǵan tarıhı tulǵalardyń keseneleri kirgizilgen. Sonyń biri Moıynqum aýdanyndaǵy Hantaýy aýyly mańyndaǵy Bınazar batyrdyń beıiti, dep jazady Qamshy.kz aqparat agenttigi. 

Qoqan handyǵyna qarsy kúreste batyrlyǵymen kózge túsken Bınazar Aqediluly Túlkibas óńirinen Shý alqabyna kóship baryp, eginshilikti damytý arqyly otyryqshylyq sharýashylyqpen aınalysqan. Batyrdyń egistis alqaptaryna sý jetkizgen júıeleri Bınazar kanaly kúni búginge deıin paıdalanylyp keledi. Al onyń batyrlyǵy Arqadan yǵysa kóshken Kenesary hannyń ıyǵynan súıep, qoldaý bildirýimen tyǵyz baılanysty. Batyr óz rýynyń qarýly jigitteri han áskerine qosqan. Sondaı-aq Kenesary áskerin azyq-túlikpen qamtamasyz etip otyrǵan. О́z kezeginde Bınazar batyr Aǵybaı, Sypataı batyrlarmen óte jaqyn qarym-qatynasta bolǵan.

El arasynda Bınazar batyrdyń eren erligin dáripteıtin ańyzdyń birinde Bóltirik sheshen ekeýiniń jolǵa qatar shyǵýy sóz bolady. Jol boıynda bel sýytyp otyrǵan eki batyrǵa jeti birdeı attyly jigitter tarap basa salady. Aıaq qoldaryn baılap, kózderi tańýly Bóltirik pen Bınazardy álgi jigitter ermek etýge kóshedi. «Bizdiń kóńilimizdi kóterip, óleń aıtyńdar» – dep qınaıdy álgiler. Sonda Bóltirik: «Sender bolsańdar qarý-jaraqty jeteýsińder, al biz qarýsyz ekeýmiz, eki shaldy baılap qoıyp, óleń aıt deýge – namystanbadyńdar ma? Bizden nesine qorqasyńdar, qoldy bosatyńdar, óleńdi sodan keıin aıtaıyq», – deıdi. «Rasymen de, bul ekeýinen ne úshin qorqamyz?» – dep ekeýiniń qolyn bosatady. Ile-shala óleńdete júrip Bınazar batyr ózine qarsy otyrǵan tórt jigitti alyp urady. О́z kezeginde Bóltirik sheshen de úsh jigitti astyna basady.

El arasynda ıgi aty qalǵan Bınazardyń jerlengen ornyna batyrdyń 190 jyldyǵy qarsańynda kesene turǵyzyldy. Demeýshilerdiń yqpalymen kesene mańyna táý ete kelýshilerge arnalǵan qonaq úı de salynǵan. Bul kesenede 2 jyl buryn «Bolashaqqa baǵdar: rýhanı jańǵyrý» baǵdarlamasy aıasynda «Qazaqstannyń kıeli jerleriniń geografııasy» jobasy boıynsha Qazaqstannyń óńirlik qasıetti nysandar tizimine engizildi.