Jalpaqsazda jańa mektep ashyldy

Jambyl oblysy T. Rysqulov aýdanyndaǵy Jalpaqsaz aýylynyń ustazdary men oqýshylary bilim kúnin zamanaýı úlgide salynǵan jańa mektep ǵımaratynda ótkizdi. Mekteptiń ashylýyna aýdan ákimi Erbolat Sadyrqulov, aýdandyq máslıhat hatshysy Tursynhan Jamanbaev, oblystyq bilim basqarmasynyń bas mamany Janna Qalybaeva, aýdan ákiminiń orynbasary Beısenbek Álpeıisov, aýdandyq bilim bóliminiń basshysy Erkin Seıtjaparov,jerles aqyn Shyryn Mamaserikova jáne aýyldyq ardagerler keńesiniń tóraǵasy Seıdimbek Shildebaevtar arnaıy kelip qatysty dep jazady Qamshy.kz aqparat agenttigi. 

Saltanatty jıyn barysynda shaqyrylǵan qonaqtar quttyqtaý sóz sóılep, izgi tilekterin arnady. Alǵashqy sóz aýdan ákimi Erbolat Sadyrqulovqa berildi. «Búgin elimizdiń ár túkpirinde san myńdaǵan búldirshin bilim kúnin qarsy alyp, mektep tabaldyryǵyn attaýda. Osy sátti tıimdi paıdalana otyryp men bilimge jany qushtar oqýshylarymyzdy tól merekelerimenquttyqtaǵym keledi. О́zderińiz biletindeı sońǵy jyldary elimizde bilim salasyna aıtarlyqtaı kóńil bólinýde. Búgin oqýshylarǵa esigin aıqara ashqan zamanaýı mektepti paıdalanýǵa berip otyrmyz. Osy mektepte bilim alǵan balalarymyz aldaǵy ýaqytta tek aýdanymyzdyń ǵana emes, oblysymyzdyń, respýblıkamyzdyń damýyna súbeli úles qosatynyna senimdimin. Jańa oqý jyly ustazdar qaýymy úshin jemisti bolsyn» ep, ǵımarattyń qurylys jumystaryn júrgizgen «Qurylys TED» jaýapkershiligi shekteýli seriktestiginiń ujymyna óz alǵysyn bildirdi.

Baqytjan Jaqsylyqov basshylyq etetin seriktestik qyzmetkerleri 48 balaǵa arnalǵan mektepti óz merziminde aıaqtady. Jobanyń jalpy quny – 338 mln. teńgeni quraıdy. Shara barysynda seriktestik basshysy da sóz sóılep, mektep meńgerýshisi Gúlzına Satylǵanovaǵa ǵımarattyń sımvolıkalyq kiltin tabys etti. Al, mekteptiń lentasyn aýdan ákimi Erbolat Sadyrqulov pen jerles aqyn Shyryn Mamaserikova jáne aýyldyq ardagerler keńesiniń tóraǵasy Seıdimbek Shildebaev qıdy. Sodan soń kópten kútken kúmis qońyraý soǵylyp, saltanatty sharaǵa qatysýshylar sáýleti kelisken ǵımaratty aralap kórdi.

Jalpaqsazdyq balalar osy kúnge deıin apatty jaǵdaıda turǵan, nebári tórt bólmeden quralǵan shaǵyn mektepte oqyp kelgen. Al, jańa oqý jylynan bastap olar sán-saltanaty kelisken jańa nysannyń qabyrǵasynda sapaly bilim alatyn bolady. Aıta keteıik, jańa ǵımaratta oqýshylar men ustazdarǵa barlyq jaǵdaı jasalǵan. Onda kıim iletin arnaıy oryn, oqý zaly bar kitaphana, oqý bólmeleri, ınteraktıvti taqtasy bar kabınet, ashana, sport

zal jáne barlyq talapqa saı jabdyqtalǵan kompıýterlik synyp bar. Sonymen qatar, san túrli ádistemelik quraldarmen qamtamasyz etilgen muǵalimder bólmesi de kópshiliktiń kóńilinen shyqty. Mektep qabyrǵasynda medısınalyq standarttarǵa saı medbıke bólmesi de bar. Mektep syrtynda oıyn alańdary men kelýshilerge arnalǵan avtoturaq ornalasqan.

«Jańa mektep ǵımaratynda bilim alamyz» degen úlken qýanyshty bilim ordasynyń tabaldyryǵyn alǵash ret attaǵan oqýshylardyń janarynan baıqaýǵa bolady. Jańa mektep partasyna otyrǵan olar jıyn sońynda «Sanaly – urpaq jarqyn bolashaq!» taqyrybynda ótken alǵashqy tárbıe sabaǵyna qatysyp, ulaǵatty ustazdarymen qaýyshty.