05 Qyrkúıek, 2019 Ádebıet
Aqyn Maqpal Jumabaı óziniń maqamdy jyrlaryn arqalap aǵylshyn halqyna Maqpalsherin tanystyrý úshin Londonǵa saparǵa attanbaqshy dep habarlaıdy Qamshy.kz aqparat agenttigi. Bul týraly aqynnyń ózi feısbýktegi jeke paraqshasynda jazdy.
"Sálem, London! Maqpalsher saǵan bara jatyr!
Dostar, meniń bul jobaǵa daıyndalǵanyma týra bir jyl boldy. Sózimdi asyl muratyma senip, qasymda bolǵan shyǵarmashylyq tobyma rahmet aıtýdan bastaǵym keledi. Biz 15 adam Londonǵa attanǵaly otyrmyz. Osy jańalyqty sizderge jetkizgenge deıin bir kitap jazýǵa bolatyndaı qyzyq pen qıynshylyqty bastan ótkerdik. Dál qazir ol mańyzdy emes! Mańyzdysy, biz zamanaýı qazaq óneri úshin táýekelge bel baılap otyrmyz. Birshama ýaqyt boldy, zamanaýı ónerimizdi damytý jolyna bilimim men tájirıbemdi arnaıtynymdy, sol jolda naqty ister bastaǵanymdy sizderge jarııalaǵan edim. Bul London sapary – sol naqty isimniń, táýekelimniń biri.
18 qyrkúıek Londondaǵy Brýnel keńistiginde (mýzeıinde) AUA konseptýaldy konsertim ótedi. Konsertti ındýstrıaldyq revolıýsııanyń zor tulǵalary Mark jáne Izambard Brýnelder 1842 jyly salǵan osy tarıhı ǵımaratta ótkizgim keldi. О́ıtkeni, olar tynyq muhıtyn kesip ótken eń alyp kemeler jasaı júrip, áıgili aspaly kópirlerdi sala júrip, jańashyl ónerdi qoldaǵan mesenattar men ımpressarıolar bolǵan. Olardyń ózgeriske, damýǵa degen senimi men dúnıeni ózgertken naqty isteri meni qanattandyrdy ári jobamyz brýneldikterdiń kóńilinen shyqty. Sol kúnnen beri úzdiksiz daıyndyqtardy bastadyq. Saparymyz ben konsertimizdiń ár sáti josparlanyp, biz sol jospar boıynsha kádimgi áskerı tártippen jyljyp kelemiz. Men 5 aı boıy senbi, jeksenbi kúnderi Almatydaǵy mýzykalyq tobyma daıyndyqqa keldim. Poıyzdar men ushaqtarda uıyqtadym. Sol aralyqta Londonda kórsetetin anımasııalyq qysqa metrli fılmimizdi aıaqtadyq. Keshte aıtylatyn barlyq jyrlardy kásibı aýdarmashy aǵylshyn tiline aýdardy. Aýdarma kórsetiledi ári qonaqtarǵa kitapsha retinde tartý etiledi. Kúni keshe ǵana uıymdastyrý jumystarynyń barlyq kezeńine núkte qoıdyq.
Bul arman-maqsattyń bastaýy qaıdan shyqqany anyq esimde: osydan eki jarym jyl buryn saıabaqta uldarymmen serýendep júrgen edim, Rahanaıym oılamaǵan jerden «Seniń armanyńnyń shegi nege tek Qazaqstan, mama, sen nege aǵylshyn tiline aýdarylǵyń kelmeıdi, nege shetelderde keshterińdi ótkizgiń kelmeıdi. Bul durys emes. Men saǵan osy suraq boıynsha oılanýǵa ýaqyt beremin. Seniń qolyńnan keledi, sen buǵan laıyqsyń» dedi. Sol sátte kókeıimdi bir beımálim sezim basty, jyladym ba, kúldim be, esimde joq, biraq, ulyma tyrysyp kórýge ýáde berdim. Dál sol kezde bul dúnıe meniń daýystap aıtýǵa batylym jetpeıtin bir kómeski armanym edi. Biraq budan soń da daýystap aıta almadym eshkimge. Tek Almatydaǵy AUA konsertinen soń, shyǵarmashylyq komandamyzben, otbasymmen ótkizgen konsertimizdi talqylap otyrǵanda, endigi núkte London bolýy kerektigin aıttym. Budan keıin de ishimdegi úmittiń janýyna sebep bolǵan áńgimeler boldy. Bári meni qoldady ári sendi. Sol senimniń kúshi, mine, Maqpalsherdi Londonǵa alyp bara jatyr.
Osy saparyma qoldaý tanytqan aıaýly adamdaryma – ata-anama, otbasyma, baýyrlaryma, dostaryma jáne Elshi Erlan Ábilfaıyzulyna rahmet aıtqym keledi.
Al, London, kút meni!" delingen jazbada.
Maqpalsherdi súıer qaýym súıikti aqyn qyzdaryna sáttilik tilep, alda alar asýdyń bul tek bastamasy ekenin, árkez qoldaıtyndaryn, tek bıikten kórgisi keletinderin jetkizdi.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir