1 mınýttyń qadiri nemese jalqaýlyqqa qarsy kaıdzen júıesin qalaı paıdalanýǵa bolady?  

Biz baıqaı bermeımiz. Jalpy ýaqyt jyldam ótip jatady. Biraq ony tıimdi paıdalanýdyń ádisi kóp. Negizi japondyq fılosofııa kaıdzen tsýraly áńgime qozǵalǵanda, biz ony únemi óndiris prosesimen nemese bıznespen shatastyryp jatamyz. Biraq kaıdzen júıesin kúndelikti ómirińizge de paıdalanýǵa bolady. Al onyń paıdasy óte zor. Tek bile bermeıtinimiz ókinishti.

Jalpy adam balasyna tán bir jaman ádet bar. Keı sátte qınalsaq, «ony erteń -aq bastaı salaıynshy» dep jalqaýlanatynymyz bar. Bul jalqaýlyq ta bolýy múmkin. Onyń ústine bir jumysty únemi isteı berseń ol jalyqtyryp jibermeı me? Ondaı jaǵdaıda ne isteý kerek? Tirlikti ózgertip turý kerek. Taǵy bir mysal, aptasyna úsh ret jattyǵý zalyna barasyz. Ol aıǵa, sosyn jylǵa sozylady. Bir saryndy tirlik sosyn sizdi jalyqtyryp jiberdi de, bárin tastap kettińiz. Taǵy da «ne isteý kerek?» degen saýal aldyńyzdan shyǵady. Mundaı jaǵdaıda ne istegen durys? Árıne, ıyǵyńyzǵa júk kóp tústi, bul áreket sizdi sharshatty. Túsinýge turarlyq nárse. Degenmen onyń jolyn tabýǵa bolady, shekten tys dene qımyly árıne adamdy sharshatyp jiberedi..

Mundaı jaǵdaıda sizge kaıdzen kómektesedi, onda 1 mınnýttyń qadirin bilýge turarlyq amal-áreket bar. Ol ne sonda? Bul – 1 mınýttyq is-áreket. Bul ádistiń máni mynada: Sizge mysaly, bir aptada 3 ret jattyǵý zalyna baryp, sharshap-shaldyǵyp qaıtýdyń qajeti joq. Kúndelikti belgili bir ýaqytta jattyǵýdy 1 mınýttyń ishinde bastap ketińiz.  1 mınýt adamnyń ýaqytyn kóp almaıdy. 1 mınýtta talaı nárse isteı alasyz. Skakalkamen sekirýge bolady, san túrli jattyǵý jasaýǵa múmkindik bar. Osylaı ýaqytty baǵalaı bilseńiz, bir mınýttyń bar ómirińizdiń máni ekenin túsine alasyz. 1 mınýtta jasaıtyn jattyǵýǵa alǵashqyda jarty saǵat arnaýdyń qajeti shamaly. Ár mınýtta ártúrli jattyǵý jasańyz. Demek, budan shyǵatyn qorytyndy ne? Siz eń bastysy, jalqaýlyqtan múlde arylasyz. Erinshektik sizdiń jolyńyzda únemi kóse kóldeneńdep turmaıdy. Odan keıin...

Ary qaraı sizdiń ýaqytty baǵalaý prınsıpińiz bastalady. 1 mınýt uzaryp, 5 mınýttyq áreketke ulasýy yqtımal. Demek siz kishkentaı qadam arqyly úlken múmkindikterge jol ashyp otyrsyz. Al odan ary 5 mınýtta jasalatyn áreket keıinnen jarty saǵatqa sozylýy múmkin. Uzamaı munyń da nátıjesi kórine bastaıdy.

Japonııada ómirge kelgen bul kaıdzen fılosofııasynyń avtory – Masaakı Imaı. Masaakı Imaıdyń aıtýyna qaraǵanda, bul tujyrymdamany bızneste de, jeke ómirde paıdalanýǵa bolady. Demek, bizdiń shyǵaratyn qorytyndy: Adam balasynyń óz ómirin ózgertip otyrýǵa múmkindigi óte mol. Ol úshin kaıdzenniń amal-tásilin ómirińizge murat etińiz. Kaıdzen jeke ómirińizdi turaqty túrde únemi ózgertip otyrýǵa kómektesedi. О́ıtkeni ýaqyt ólsheýli, ár mınýttyń qadiri bar..

Erkin Qaldan