Joldaý kásipkerlerge kórsetiletin jeńildigimen qundy

Memleket basshysy Qasym-Jomart Toqaevtyń búgingi halyqqa arnaǵan alǵashqy Joldaýy bıznes ókilderi úshin tosyn, ári jaǵymdy jańalyqtarǵa toly boldy.

Ásirese, Prezıdenttiń «Jumys berýshiniń jumysshyǵa qosymsha 5 paıyz zeınetaqy aýdarýy 2023 jylǵa shegeriledi», - degen sózi kásipkerlerdiń eńsesin kóterip tastady. Bul másele aıtylǵan sátten bastap «Atameken» Ulttyq kásipkerler palatasy bızneske ary qaraı aýyrtpalyq salýdy ulǵaıtýǵa qarsylyǵyn bildirip, atalǵan normalardy qaıta qaraý boıynsha naqty pozısııany ustanǵan bolatyn. Sonymen qatar, Ulttyq palata óz kezeginde kásipkerlerdi, qaýymdastyqtardy, táýelsiz sarapshylardy tartý arqyly máseleni jan-jaqty talqylaýǵa da shaqyrdy. Mine, búgin nátıjeni kórip otyrmyz, Qasym-Jomart Kemeluly 5 paıyzdyq mindetti zeınetaqylyq jarnanyń engizilý merzimin shegerýdi tapsyrdy.

Joldaýdaǵy bıznes ókilderi úshin kelesi úlken qoldaý – Prezıdenttiń mıkro jáne shaǵyn bıznes kompanııalaryn tabysqa salynatyn salyqtan 3 jylǵa bosatý týraly Úkimetke zańdy negiz qurýdy tapsyrýy. Jambyl oblysynyń bıznes ókilderi sońǵy kezderi kórshi О́zbekstan elindegi shaǵyn jáne orta bızneske kórsetilip jatqan jeńildikterdi qyzyǵa aıtyp, osy máseleni Kásipkerler palatasynyń О́ńirlik keńes músheleri de kóterip júrgen bolatyn. Memleket basshysynyń búgingi

Joldaýda Úkimetke bergen tapsyrmasyn kásipkerler qýana qabyldady. Nátıjesimen jańa jumys oryndary ashylyp, óz elimizde óndiriletin ónimder sapynyń artary sózsiz.

Joldaýda aıtylǵan «Bıznestiń jol kartasy» baǵdarlamasyna qosymsha bólinetin 250 mlrd.teńge, memlekettik satyp alýdaǵy ashyqtyqty talap etý, 2020 jyldan bastap 3 jylǵa deıin mıkro jáne shaǵyn kásipkerlikti tekserýge tyıym salý, ekonomıkany ártaraptandyrýǵa qatysty máseleler kásipkerlerdiń kókeıinde júrgen jaıttar bolatyn.

Memleket basshysy bul qadamdar arqyly elimizde kásipkerlikti qoldaý aldaǵy ýaqytta da jan-jaqty júrgiziletindigin kórsetti. Joldaý kásipkerlerge osyndaı kórsetilmek jeńildikterimen qundy.

Oljas Qarjaýov, Jambyl oblysy kásipkerler palatasynyń dırektory