«Baqytty otbasy» baǵdarlamasy boıynsha Almatydaǵy kópbalaly analardyń baspana máselesi sheshiledi

Ertaı AIǴALIULY, «Qazaqstan dauiri» gazetiniń Bas redaktory:

Prezıdent Qasym-Jomart Toqaevtyń halyqqa arnaǵan tuńǵysh Joldaýyn qarap shyqtym.

«Joldaýda ne aıtylady eken?» degen oı kópshiligimizde bolǵany ras. Halyqtyń áleýmettik jaǵdaıyna basa mán beripti. Halyqtyń da kóńilinen shyǵady degen senimdemin. Eń bastysy, osy aıtylǵan sózder men kóterilgen máseleler óz sheshimin taýyp jatsa, halyqqa odan artyq ne kerek? Kún tártibinde turǵan ózekti máseleler jetip-artylady. Qaı salany alsańyz da, búgin siz ben biz aıtyp bere alatyn dárejedemiz.

Joldaýdy oqyp otyryp, «bul másele endi qalaı bolar eken?» degen kúmándi oı bolǵanyn jasyrmaımyn. Ol bárimizge belgili – Jer máselesi. Kezinde aýylda jaıylym jerler bolmaı qalǵanyn bilemiz. Qaı halyq bolsyn Jer – ol úshin eń qasterli, eń qasıetti qazynasy. Jerdi paıdalana alatyn sharýaǵa berip jatsa, az ǵana jyldyń ishinde ol da óz nátıjesin beretinine sený kerek. El arasynda jerge qatysty qaýeset júrgeni taǵy belgili. Prezıdent soǵan núkte qoıyp: «Memleket basshysy retinde taǵy da málimdeımin: jerimiz sheteldikterge satylmaıdy. Oǵan jol berilmeıdi» deıdi. Sený kerek. Osydan keıin endi bos, daqpyrt sózderdi tyıǵan jón dep oılaımyn.

Kóńilime qonǵan taǵy bár másele – «Baqytty otbasy» baǵdarlamasy boıynsha bıyl 6000 otbasy úı alady delingen. Baspana qazaqtardyń eń úlken «bas aýrýy» ekenin jaqsy bilemiz. 30 myńdaı kópbalaly otbasy bolsa, 2-3 jyldyń ishinde olardyń bárinde úı bolady degeni óte qýantarlyq jaǵdaı. Baǵdarlama Almaty qalasynda bastalyp ta ketti. Bıýdjettik nesıelendirý baǵdarlamasyna qatysýshy kópbalaly otbasylarǵa Almaty qalasy ákimdiginen quny 1 mln teńgelik turǵyn úı sertıfıkaty beriledi. Bul qarajat zaem alar kezde alǵashqy jarnany óteýge arnalǵan. Nesıe tek jańa turǵyn úıdi satyp alý úshin beriledi. Zaemnyń eń joǵarǵy somasy 15 mln teńgege teń. Almatylyq turǵyndar «Baqytty otbasy» baǵdarlamasy boıynsha páterdi ózderi izdep tabýǵa tıis. Bul buryn-sońdy bolmaǵan tamasha jańalyq qoı.

Qazaq kóbeıý kerek. Búgin memleket kópbalaly otbasylardyń qoltyǵynan demep, olardyń ósip-ónýine jaǵdaı jasap berse, erteń sol balalar memleketti kóteretin bolady. Men oǵan senimdimin. О́ıtkeni, san bar jerde árdaıym sapa bar.