Darhan Myńbaı Jambyl oblysyna jumys saparymen keldi

Jambyl oblysyna Qazaqstan Respýblıkasy Parlament májilisiniń depýtaty, «Nur Otan» partııasynyń depýtattyq fraksııa múshesi Darhan Qamzabekuly Myńbaı jumys saparymen keldi. Ol aýdandardyń tynys-tirshiligimen tanysý maqsatynda Merki aýdanyna at basyn burdy dep jazady Qamshy.kz aqparat agenttigi. 

Birinshi kezekte Májilis depýtaty «Merki irimshik zaýyty» AQ jumysymen tanysty. Zaýyttyń ınjener-tehnology Lıýdmıla Galensova kelgen qonaqtaryd qarsy alyp, zaýyttyń jumys barysymen tanystyrdy. Munda 40-qa jýyq sút ónimderiniń túrleri shyǵady eken. Atap aıtsaq, irimshiktiń birneshe túri, aırannyń tátti qosylǵany, tuzdy túri, brynza, ártúrli maılylyqtaǵy qaımaq jáne sary maı ónimderi. Bul taýarlar naryqta kópshiliktiń suranysyna ıe. О́nimder jármeńkesimen tanystyrǵan maman sonymen qatar zaýyttyń tarıhyn baıandap, kóp jylǵy jetistikterimen tanystyrdy. Ol úshin akt zalynda arnaıy taqtaısha da ornalastyrylypty. Zaýyt 126 adamdy jumyspen qamtyp otyr. Maýsymdyq kezeńde kúnine 35 tonna ónimdi óńdese, qazirgi kúni 20 tonna sútten túrli taǵamdar shyǵaryp otyr. Bul zaýyttyń basqa zaýyttan ereksheligi eshqandaı qospasyz taza ónim shyǵarýynda.

70 jyldyq tarıhy bar bul kásiporynnyń qurylǵylary eskirgen. Jańalaýdy qajet etip-aq tur. Zaýyt jumysshylary Parlament májilisi depýtaty Darhan Qamzabekulyna qural-jabdyqtaryn jańalaýǵa memleketten qoldaý kórsetilse degen usynystaryn bildirdi.

Kelesi kezekte aýdandyq №18 Balalar jáne jasóspirimder sport mektebine bardy. Mektep dırektory Dýlat Maratuly mundaǵy jattyqtyrylatyn 10 sport túriniń árbirine toqtala kele, sport mektebiniń jasaqtalýyn, jattyqtyǵý zaldaryn aralatyp kórsetti. Sport mektebi shákirtteriniń baǵyndyrǵan belesteri de az emes ekendigine Maqtaý taqtasyna qarap, kóz jetkizdik. Munda qol kúresten jaqynda ǵana Túrkııa elinen Álem chempıony atanyp kelgen Jarqynaı Rahymbaeva men qol kúresten Azııa chempıony Bıbimarııa Kópjasarova da jattyǵady eken.

Jalpy sporttyń on túrinen 737 shákirt tárbıelep otyrǵan irgeli shańyraq ujymyna sáttilik tilep, jumysshy top №9 Savva atyndaǵy mektepke jetti. Munda dál osy kúni «STEAM LABOROTORY» – IT synybynyń ashylý saltanaty QR Parlament májilisiniń depýtatynyń kelýine arnaıy daıyndalypty. Al qyzyl lentany Darhan Myńbaı men aýdan ákiminiń orynbasary Marat Qasym kesip, robototehnıka synyby oqýshylary men ustazdaryna bıik belesterge jetip, aýyl sharýashylyǵynda, kúndelikti turmysta paıdasy tıetin qurylǵylardy oılap tabýdy usyndy.

Darhan Qamzabekuly mundaǵy ustazdarmen kezdesip, tilek, nıet, usynystaryn tyńdady. Aldaǵy oqý jylynda sanaly shákirt tárbıelep, sapaly bilim berýlerine tilektestigin aıtty.

Budan soń «Rýhanı jańǵyrý» baǵdarlamasy aıasynda mektep janynda bıylǵy jyly ǵana ashylǵan qoǵam qaıratkeri, qazaq halqynyń kórnekti perzenti Turar Rysqulovtyń mýzeıin kórdi. Munda mektep oqýshylary árbir buryshqa anyqtama berse, №9 mektep muǵalimi Nazgúl Tólendiqyzy mýzeıdiń qalyptasý tarıhyn baıandady. Bul mýzeı T.Rysqulov pen M.Jylysbaevtardyń 1907-1910 jyldary oqyǵan mektebi edi. El aýzynda «Qyzyl úı» atanyp ketken bul ǵımarat qaıta qalpyna keltirý jumystarynan soń mýzeı bolyp ashyldy. Darhan Qamzabekuly mundaǵy estelik kitapqa: «Túrkistan tutas bol! Túrki jurty túgel bol!»-dep uran tastaǵan babamyzdyń izi qalǵan árbir jer – bizdiń tarıhymyz, ortaq maqtanyshymyz. Mýzeıdiń mańyzyn keler urpaq baǵalaıtyn bolady. Jaqsy iske súısinesiń, janashyr bolǵyń keledi. Eksponattar kóbeısin, taǵylymy mol bolsyn»,- degen tilek jazyp, qoltańdasyn qaldyrdy.

Ulttyq sanamyzdy jańǵyrtyp, tarıhymyzdy dáripteıtin bul iske oń baǵa bergen QR Parlamenti májilisiniń depýtaty T.Rysqulov aýdanyna attandy. Munda memlekettik-jekemenshik áriptestik negizinde salyndar «M.Mıras» balalar baqshasyna, Qulan aýyl sharýashylyq kolledjine, «AgroPark Qulan» jaýapkershiligi shekteýli seriktestiginiń 100 gektarǵa ornalastyrǵan shıe baǵyna baryp, aýdannyń áleýmettik-ekonomıkalyq damýyn baqylady.