Prezıdent "qysqartý" naýqanyn bastady

Prezıdent Qasym-Jomart Toqaev memlekettik kompanııalardyń, olardyń qyzmetkerleri men memlekettik qyzmetshilerdiń sanyn qysqartý kerektigin málim etti, dep habarlaıdy Qamshy.kz aqparat agenttigi QazAqparatqa silteme jasap.

"Memlekettik kompanııalar konglamerattarǵa aınalyp shyǵa keldi. Muny túsiný kerek. Halyqaralyq básekege qabiletke bul aıtarlyqtaı kúmán týǵyzyp otyr. Memlekettiń ekonomıkaǵa aralasýyn qysqartý úshin men kvazımemlekettik kompanııalardy qurýǵa moratorıı jarııaladym. Biz sońǵy 14 jylda ulttyq ál-aýqat qorynyń halyqtyń jaǵdaıyn kóterýde qanshalyqty paıdasy bolǵanyn uǵynýymyz kerek. Úkimet Esep komıtetimen birge úsh aıdyń ishinde taldaý júrgizip, memlekettik holdıngter men ulttyq kompanııalardyń tıimdiligin zertteýi kerek", – dedi Memleket basshysy Qazaqstan halqyna Joldaýynda.

Sondaı-aq Joldaýda 2024 jyldan bastap memlekettik qyzmetkerler men ulttyq kompanııalardyń jumysshylary sany 25 paıyzǵa qysqaratyny aıtyldy.

"Memlekettik qyzmetkerlerdiń sapasyn arttyrý úshin  olardyń qataryna jas daıarlanǵan mamandardy tartý qajet. 2020 jyldan bastap memlekettik qyzmetkerler sanyn birtindep qysqartýǵa kóshemiz.  Odan bosaǵan qarjyny  paıdaly qyzmetkerlerdi materıaldyq turǵyda yntalandyrýǵa baǵyttaımyz. 2024 memlekettik qyzmetkerler men ulttyq kompanııalardyń jumysshylar sanyn 25 paıyzǵa, ıaǵnı tórtten birine qysqartý kerek", – dedi Qasym-Jomart Toqaev.