"Taý samaly" lagerinde  múmkindigi shekteýli jastarǵa arnalǵan oqytý lageri óz jumysyn bastady

Keshe Jýaly aýdanyndaǵy «Taý samaly» lagerinde «Múmkindikter mekeni» dep atalatyn oblystyq jastar lageri túndigin túrdi. Bul joly taý bókterindegi jasyl jelekpen kómergen aýmaqta tynystaýǵa  tuńǵysh ret múmkindigi shekteýli jastar múmkindik aldy. Oblystyń barlyq aýdandarynan kelgen  múmkindigi shekteýli jastar men olardyń kútýshilerinen, ata-analarynan turatyn demalýshylardyń jalpy sany 230-dan asyp jyǵylady dep jazady Qamshy.kz aqparat agenttigi. 

Múmkindigi shekteýli jandar úsh kún boıy qalanyń ý-shýynan qashyqtaǵy taýdyń saf aýasymen demalyp qana qoımaı túrli semınar-trenıngterdiń belsendi qatysýshy atanbaq.

Jambyl oblystyq jastar resýrstyq ortalyǵy muryndyq bolyp otyrǵan shara Jastar jyly qarsańynda múmkindigi shekteýli jandardy qoǵamnan shet qaldyrmaı kerisinshe olardyń laıyqty ómir súrýine jaǵdaı jasaý maqsatyn kózdeıdi. Oqytý lageriniń ashylý saltanatynda sóılegen sózinde oblystyq jastar resýrstyq ortalyǵy dırektorynyń orynbasary Aıbek Táýten de osy jaıtqa basa nazar aýdardy.

–Bizde buǵan deıin jastardy oqytý lageri ártúrli formatta, túrli taqyryppen ótkizilgen. Bıylǵy erekshelik biz munda múmkindigi shekteýli jastardy jınap otyrmyz. Úsh kúndik oqytý lageri barysynda biz olardyń shyn máninde shekteýsiz múmkindik ıesi ekendigine kózderin jetkizetin bolamyz. Semınar-trenıngter «Nur bala» qoǵamdyq qorynyń bilikti mamandarymen jáne oblystyń belsendi jastarymen júrgiziledi. Eń bastysy taý bókterindegi janǵa jaıly klımat múmkindigi shekteýli jandardyń densaýlyǵyna oń áserin tıgizeri anyq. Jáne olardyń barlyǵynyń densaýlyq jaǵdaıy úsh kún boıy dárigerlerdiń turaqty baqylaýynda bolady,–deıdi A.Táýten.

Oqytý lageriniń ashylý saltanatynda demalýshylardyń alańsyz tynystaýyna jaýapty uıymdastyrý komıtetiniń músheleri jáne top jetekshileri tanystyryldy. Munan ári shara konserttik baǵdarlamaǵa ulasty.

Aıta ketý kerek úsh kúnge sozylatyn oqytý lageriniń alǵashqy kúninde demalýshylar «Nur bala» qoǵamdyq qorynyń  psıholog mamandary Áıgerim Dáýletbaeva, Saltanat Sádýaqasovanyń semınar trenıngterine qatysyp, toptyq jumystarǵa atsalysady. Sondaı-aq múmkindigi shekteýli jastarǵa oblys maqtanyshy, paralımpıadalyq oıyndarynyń chempıony Zýlfııa Gabıdýllına syndy túrli salada jemisti eńbek etip júrgen moderatorlar dáris oqıdy.