Jambyldyq boksshy Baqtııar Artaevtyń Olımp shyńyn baǵydyrǵanyna 15 jyl

2004 jyldyń 28 tamyzyn qazaqstandyq boks jankúıerleri áli kúnge esten shyǵarmaıdy. О́ıtkeni dál osy kúni Afına Olımpıadasyndaǵy ulttyq qurama qorjynyndaǵy jalǵyz altyn alqany jambyldyq Baqtııar Artaev jeńip alǵan edi dep jazady Qamshy.kz aqparat agenttigi. 

Kúlli álem kóz tikken bul básekede áýesqoı boksdan 69 keli salmaq dárejesinde el namysyn qorǵaǵan Baqtııar Ýkraınanyń úkilegen úmiti Vıktor Polıakovpen qolǵap túıistirdi. Bul saıysta ózin barynsha erkin ustaǵan qazaq sportshysy kezdesý taǵdyryn úshinshi raýndta sheshti. Árıne áýesqoı boksta jekpe-jektiń raýnd máresine jetpeı aıaqtalýy neǵaıbyl. Alaıda Baqtııar bir mezette qarsylasyna úzdiksiz jumsaǵan soqqylary esebinen 6 upaı oljalaǵan tóreshi kezdesýdi toqtatýǵa májbúr boldy. Al jartylaı fınalda jambyldyq jampoz bala kúninen ózi eliktegen reseılik Oleg Saıtovpen jekpe-jekke shyqty. Eki márte Olım shyńyn baǵyndyryp, eki márte Eýropa birnshiligin oza shyqqan Saıtovtaı saıypqyrandy tórt raýnd boıy es jıǵyzbaı soqqynyń astyna alǵan Baqtııardyń bul áreketi kópti súısintti. Solaı Saıtovtyń Reseı boks tarıhyndaǵy úsh dúrkin Olımpıada chempıony bolý degen asqaq armany kókke ushty.

Al fınaldyq jekpe-jekti Artaev kýbalyq Aragonǵa qarsy ótkizdi. Á- degennen jekpe-jekke qarqynmen kirisken Baqtııar kýbalyq boksshynyń tynysyn taryltty. Buǵan deıingi saıystarynda ózin rıngtiń qojaıynyndaı sezinetin Aragon bul joly shyndap sasty. Qazaq boksshysynyń kóz ilespes qımyly tórt raýnd boıy tómpeshtegen ol kúmisti qanaǵat tutýǵa májbúr boldy. Delbesi qozǵan jankúıerler de elektrondy tablodaǵy esepti kórgende baryp qazaq boksshysynyń Olımpıada chempıony bolǵanyn túsindi.
Qarsylasynan 10 upaı aıyrmasymen basym túsken Artaev osylaısha Afına Olımpıadasyndaǵy ulttyq qurama qorjynyndaǵy jalǵyz altynǵa ıe
boldy. Altyn alqamen qosa Artaev sol joly sharshy alańdaǵy sheberligi sharbolattaı shyńdalǵan boksshylarǵa ǵana beriletin Vel Barker kýbogyn ıelendi. Osy jeńisten keıin Jazǵy Olımpıada oıyndaryndaǵy áýesqoı boksta 69 keli salmaq dárejesi «qazaqtyń jeńis salmaǵyna» aınaldy. Odan keıingi Olımpıada oıyndarynda dál osy salmaqta óner kórsetken Baqyt Sársekbaev, Serik Sápıev, Danııar Eleýsinov qazaq Ánuranyn Olımptiń bıik tuǵyrynda turyp shyrqady.