Qulandaǵy "Qyz áýlıeniń" qupııasy mol

Qazaqstanda aýmaǵynda «Qyz áýlıe» atalatyn jerler óte kóp. Olardyń bári de el basyna kún týǵanda etigimen sý keshken erlermen tize biriktire atqa qonyp, qolyna qarý alǵan jaýjúrek arýlarǵa arnalǵan. «Rýhanı jańǵyrý» baǵdarlamasy aıasynda halyq jadynda qaıta jańǵyrǵan sondaı orynnyń biri Jýaly ólkesindegi Qulan taýynyń «Qyz áýlıe» shatqaly sanalady dep jazady Qamshy.kz aqparat agenttigi. 

«Qyz áýlıe» shatqaly mańynan bastalǵan bulaq taýdyń etegindegi egindi alqaptardy sýarýǵa kádege jaraıdy. Bulaq bastaýynda floranyń mol túrin keziktirýge bolady. «Qyz áýlıege» shatqaly zııarat ete barǵandar onyń basyndaǵy talǵa aq mata baılap, bulaq sýyn emge paıdalanady. El arasynda «Qyz áýlıege shyn nıetimen barǵandardyń boıyndaǵy, ómirindegi túıinder tarqatylady eken», degen ańǵyzǵa bergisiz áńgimeler de jıi aıtylady.

Al «Qyz áýlıege» qatysty aıtylatyn ańyzdardyń bir nusqasynda qyryq qyz kómekshilerin ertken bir hannyń qyzy shatyr tigip otyrǵany sóz bolady. Osy mańdaǵy aýylda turatyn kónekóz qarııa Derbish esimdi qarııanyń aýzynan jazyp alynǵan estelikte «Qyz áýlıe» týraly ańyzdy bylaı baıandalady: «Ilgeride osy mekende bir qyz ómir súrgen desedi. Ol jastaıynan keleshekti boljaıtyn kóripkeldik qasıetke ıe bolypty. Qyzǵa kelip bal ashtyryp, onyń aıtqanynyń dál keletine osy mańnyń turǵyndary tánti bolǵan eken. Kúnderdiń kúninde osy óńirdi jaılap otyrǵan bir baıdyń tabyn jylqysy joǵalyp ketedi. Aınalany túgel sholyp, aqyry amaly taýsylǵasyn baı jylqylardyń qoldy bolǵandyǵyn sezip, álgi qyzǵa kelip bal ashtyrady. Sonda kóripkel qyz uzaq oılanbastan: «Sizdiń tilegińizdi oryndaıyn, alaıda qoıatyn bir shartym bar. Men jylqylardy taýyp bergenimmen ómirime sol qaraqshylardan úlken qaýip tóngeli tur. Sondyqtan da siz meniń ómirim men qaýipsizdigimdi qorǵaýyńyz kerek» – degen shart qoıady. Tek baıýdy ǵana oılaǵan baı oılanbastan qyzǵa kelisimin beredi. Jylqylary tabylyp, qaraqshylardyń qylmysy áshkere bolady. Alǵashynda qyzǵa bergen ýádesin berik oryndaǵan baı ýaqyt óte óziniń kúıki tirliginiń qamymen ketip qyzdyń sharty umytylyp ketedi. El – jurttyń aldynda urlyqtary áshkere bolyp, masqara bolǵan qaraqshylar bir urymtal qarańǵy túndi paıdalanyp, qyzdy býyndyryp óltirip ketedi. Sol ýaqyttan bastap jerdiń ataýy «Qyz áýlıe» shatqaly dep atalyp ketken», deıdi qarııa.

Qalaı desekte jergilikti turǵyndar osy shatqalyn kıeli sanaıdy. Aýyrǵandary dertine daýa suraıdy. Tipti «Qyz áýlıe» shatqalynyń mańynda ósken aǵashtyń bir shybyǵyna da qol suqpaıdy.