Mańǵystaýdaǵy 9, 10 synyp oqýshylary jańartylǵan bilim baǵdarlamasyna kóshedi

Aqtaýdaǵy Nazarbaev Zııatkerlik mektebinde Mańǵystaý oblysy pedagogtarynyń tamyz keńesiniń pándik seksııalary ótti. Jyl saıyn uıymdastyrylatyn jıynǵa ólkeniń 800-den asa muǵalimi qatysty.
Konferensııanyń basty taqyryby aımaqtaǵy jalpy bilim berý mektepteriniń 9, 10 synyp oqýshylary jańartylǵan bilim berý baǵdarlamasy boıynsha oqýǵa ótýi. Kezdesý barysynda sarapshylar men ustazdar baǵdarlamanyń erekshelikterine toqtalyp, pándik seksııalardyń arnaıy sheberlik saǵattaryna qatysty.
Jınalys barysynda zııatkerlik mektep dırektory Ermek Paızov jańartylǵan baǵdarlamanyń dástúrli bilim berý ádisinen aıyrmashyylyǵy týraly aıtty.
- Seksııalyq otyrystarda zııatkerlik mektep muǵalimderi 9,10 synyptyń pán muǵalimderine ádistemelik kómek kórsetip, kásibı turǵyda ósýine yqpaldasyp, Aqtaýdaǵy Nazarbaev Zııatkerlik mektebindegi óz tájirıbelerimen bólisedi. Oblys pedagogtarynyń sheberlik saǵattaryna belsendi qatysatyndyǵy qýantady, - deıdi mektep dırektorynyń orynbasary Yryskúl Imambeva.
Sheberlik saǵattarda baǵalaý krıterııleri, deskrıptorlar jáne CLIL tehnologııasynyń jańalyqtary týraly baıandaldy. Keıin qatysýshylar tájirıbelik jumys jasap, baǵalaý jumystaryn júrgizdi.
- Informatıka páni boıynsha ózgerister bar. Osyǵan deıin robototehnıka úıirme retinde júrgizilip kelse, endi balalar ony kúndelikti oqý baǵdarlamasyna qosyp oqıdy. Robototehnıka qarqyndy damyǵan zamanda bul durys sheshim degen oıdamyz. Endi oblystyq deńgeıdegi robototehnıka jarystarǵa balalar myqty jobalarmen jáne qabilettermen qatysady,- deıdi ınformatıka páni ádistemelik birlestiginiń jetekshisi, pán muǵalimi Djamal Mamıeva.
Esterińizge sala keteıik, jańartylǵan bilim berý baǵdarlamasyna byltyrǵy oqý jylynda 3,6,8, synyp oqýshylary ótken edi.