Drama teatrdy qys maýsymyna deıin qalpyna keltirý tapsyryldy

Drama teatrdy qalpyna keltirý jumystary órtten keıin jedel túrde bastaldy. Qazir nysanda 22 kompanııa jumys istep jatyr, olar teatrdy óz qarajattaryna qalpyna keltirip berýge bastama kótergen.

– Qazir teatr ǵımaratynyń shatyry, elektr jelileri men syrtqy qasbetin qalpyna keltirý, ishki árleý jumystary júrip jatyr, – deıdi Atyraý oblystyq qurylys basqarmasynyń basshysy Málik Amanov. 

– Sonymen qatar, 12 birlik arnaıy tehnıka tartylyp, 200-den astam adam jumys isteýde. Teatr ujymy da tys qalmaı, qalpyna keltirý jumystaryna belsendi atsalysýda.

Teatr ǵımaratyn aralap shyqqan aımaq basshysy Nurlan Noǵaev órtke sebepker bolǵan elektr tustamany kúrdeli jóndeý júrgizilgen kezde jańartpaǵan teatr basshylyǵyn synǵa aldy. Oblys ákimi jaǵdaıdy jan-jaqty saralap, kinálilerge shara qoldanýdy tapsyrdy.

Teatr ǵımaraty jańartylyp, bıyl mamyr aıynda ashylǵan bolatyn. Qalpyna keltirý jumystary barysynda sahna jóndelip, kreslolar men akýstıkalyq jabyndy almastyryldy, kórermen zalyn jaryqtandyrý tehnıkasy jańartyldy.

– Bul barlyq oblys turǵyndary úshin úlken syn boldy, biraq adamdardyń nemquraıly qaramaǵandyqtarynyń arqasynda qalpyna keltirý jumystary órtten keıin biraz saǵattan soń bastaldy, – dedi Nurlan Noǵaev. – Kóp jumys isteý kerek, asyǵystyqqa jol berýge de bolmaıdy, qys túskenshe ýaqytymyz bar. Mamandardyń baǵalaýynsha, úsh aı ishinde qalpyna keltirý jumystaryn tolyǵymen aıaqtaımyz.