Degen eken...

Keshiriler kemshilik

"Egemen Qazaqstan" AQ-nyń burynǵy prezıdenti, jýrnalıst Saýytbek Ábdrahmanov kezinde Syr boıyndaǵy bir is sapary barysynda Shıelidegi "Qazataomóndirisi" AQ-na qatysty №6 ken basqarmasyna soǵady. Jergilikti ákimder men ken basqarmasynyń basshylary quraq usha kútip, jumys jaǵdaıymen tanystyrady. Sońynan qorytyndy jıyn ótedi. Sońynan sóz alǵan qalamger óz tujyrymdaryn aıta kelip: "Negizinen jumystaryńyz durys sekildi. Degende, bir kemshilikterińiz bar eken..," dep basshylarǵa synaı qaraıdy. Laýazymdy adamnyń aýzynan kemshilik degen sóz shyqqanan "Oıpyrmaı, qaı jaǵymyzdan qudaı uryp qalar eken" jergilikti basshylar qypylyqtaı bastaıdy. "Kemshilikterińiz sol.., rýǵa bólinedi ekensizder..", deıdi Saýytbek. Basshylardyń biri: "Joq, á, bizde bólinýshilik joq", dese, ekinshisi moıyndaǵandaı: "Qazaq bolǵan soń, ondaı-ondaı kezdesip qalýy múmkin..." dep kúmiljıdi. Shamaly úzilis jasap alǵan depýtat: "Jáne de olaryńyzdy ár jerge jazyp qoıady ekensizder" dep qadala túsedi. "Olaı emes deseńizder, RÝ-6, RÝ-4, RÝ-3" degen jazýy bar kórnekilikti qalaı túsinemiz?" deıdi kúlmesten. Osy kezde aldyńǵy sózdiń zilinen sasqalaqtaǵan basshylar Ábdrahmanovtyń ázildep otyrǵanyn endi ańǵarǵandaı jamyraı sóıleı jónelisipti: "Oıbaı-aý, ol mekemeniń aty emes pe, RÝ-degen "Rýda Ýpravlenıe" degenimiz ǵoı...

 Diril men dúril

Belgili jýrnalıst Aqaıdar Ysymov 67 jasynda ekinshi nekeli áıelinen uldy bolyp, qýanyshyn ózi týǵan aýyly – Telikólde de atap ótedi. Bul jıynǵa negizinen ınstıtýtta birge oqyǵan jaqyn dostary, syılas jora-joldastary qatysady. Kóńildi dastarhan basynda ataqty telejýrnalıst Tileýqabyl Myńjasarov daýsyn myń qubylta dirildetip, ártistik mánermen jurttyń ishek-silesin qatyryp otyrsa kerek. Kópshilikpen birge jadyrap otyrǵan Saýytbek te ázildi ary qaraı jalǵastyryp: "Degende jasy alpystan asqan kisiniń dirilden aýlaq bolǵany jón. Ásirese, Sen.., Aqaıdar baıqa!", deıdi astarlaı sóılep. Sol kezde Aqań saspastan: "Á, myna qyzyqtyń bári – sol diril men dúrildiń arqasy shyǵar..." depti.

Ár jazýshynyń óz stıli bar

Syqaqshy jazýshylar Ǵabbas Qabyshev pen Esenjol Dombaev ádebıet týraly áńgimelesip otyrǵandarynda: "Ár ıýmorıstiń óziniń stıli bar, meniń stılim, mysaly, Sadyqbektiń, Ospanhannyń, Ospanáliniń stılinen bólek, uqsamaıdy, uqsamaýy kerek. Áıtpese, bári birdeı bolsa, sonda ne bolady?" – dep betine suraýly júzben qaraǵan Esenjolǵa Ǵabbas: "Onda leksııa bolady", – deıdi ile-shala. Buǵan Dombaev rıza bolyp qalsa kerek, kúlip jiberipti.

Emge tappaısyń

Keńes odaǵy kezinde, sonaý jetpisinshi jyldardyń bas kezi bolsa kerek, ssenarıin jas talant jazýshy Dýlat Isabekov jazǵan "Gaýhartas" fılmi  túsirilip, Máskeýge bekitýge Goskınonyń bastyǵy Qaltaı Muqamedjanov alyp barady. Talqylaýdan soń odaqtyq komıssııa fılmdi negizinen ekranǵa jiberýge kelisedi de, ıdeologııa jaǵynan bir eskertpe jasaıdy. "Bári jaqsy, degende fılmde orys ultynyń birde-bir ókili joq eken", deıdi. Qashanda qaljyńy daıyn Qaltaı aǵamyz sonda: "Sıyr baǵatyn, shoshqa baǵatyn orystar Qazaqstanda bar, al qoı baǵatyn bir orysty emge tappadyq", – dep ázilge súıengen ýáj aıtyp tapqyrlyq tanytqan eken.

Jınaǵan Nurmahan ELTAI,

Qyzylorda oblysy