ShQO-da «Tolaǵaı sultany-2019» sporttyq-shyǵarmashylyq baıqaýynyń qorytyndysy shyǵaryldy

Qazylar alqasy men kópshilik qaýymnyń kóńilinen shyǵý úshin halyq ánderin áýelete shyrqap, ulttyq aspaptarda oınap, stendap kórsetip, ártúrli sıqyrlardy kórsetti.

 

Ásirese, Besqaraǵaı aýdanynan kelgen Danııar Bekbolatovtyń seriktesimen birge aralas jekpe-jekten úzindi kórsetkeni kórermenderdiń esinde uzaq ýaqyt boıy saqtalary sózsiz. 

 

– Barlyq qatysýshylardyń daıyndyǵy myqty. Jarys joǵary deńgeıde ótti. Bul saıys maǵan erekshe kúsh-jiger berdi. Qol kúresten ekinshi oryn aldym. Dombyramen terme aıtyp, mýzykanyń súıemeldeýimen óleń oqydym. Budan soń joldasymmen birge aralas jekpe-jektiń ádis-tásilerin kórsettik. Mundaǵy basty maqsat – jastardyń sportqa degen qyzyǵýshylyǵyn oıatyp, salaýatty ómir saltyn nasıhattaý, – dedi Danııar Bekbolatov. 

 

 

Shyǵarmashylyq baıqaýdyń sońynda vıktorınalyq suraqtar qoıyldy. Qatysýshylar qazaq halqynyń salt-dástúri men ádebıetinen, aqyn-jazýshylardyń shyǵarmashylyǵynan syr shertetin saýaldarǵa jaýap berdi. Budan soń qazylar alqasy mirdiń oǵyndaı myqty jigitterdiń ishinen jeńimpazdy anyqtaýǵa jóneldi. Al aýdan turǵyndary men qonaqtary ortalyq alańǵa baryp, ánshiler men bıshilerdiń ónerlerin tamashalady.

 

Baıqaýdyń qorytyndysy boıynsha úshinshi oryndy Pavlodardan kelgen Batyrbek Qoshqarbaev ıelendi. Oǵan 500 myń teńge tabystaldy. Ekinshi oryndy alǵan Tileýhan Nurhanǵa 700 myń teńge usynyldy. Al baıqaýdyń eki kezeńinen súrinbeı ótken Túrkistan oblysynyń týmasy Aqbar Elýbaıuly 1 mıllıon teńgeni qanjyǵasyna baılady. Bas júlde Abaı aýdanynyń namysyn qorǵaǵan Aıdos Úrkimbaevqa buıyrdy. Ol sýjańa Lada Granta avtokóligin tizgindedi. 

 

Mereke demeýshilerdiń qoldaýymen ótti. Baıqaý barysynda atalmysh sharanyń ótýine muryndyq bolǵan Kókpekti aýdanyndaǵy "Elimaı" agroónerkásiptik kesheniniń dırektory Bolat Bekberdınov sóz alyp, jıylǵan qaýymǵa jyly lebizin bildirdi. Osy oraıda kásipkerdiń aıtýly dodanyń jeńimpazyna Lada Granta avtokóligin tartý etkenin atap ótken oryndy. 

 

Is sharaǵa Kókpekti aýdanynyń damýyna ólsheýsiz úles qosqan jandar men qurmetti azamattar da qatysty. Sonyń biri orta bilim berý júıesine aqparattandyrýdy engizgen tanymal fızık, professor, matematık Adambek Tatenov. Ol taıaýda Tassaı aýyly men Besqaraǵaı aýdanyndaǵy mektepke vırtýaldy-ınteraktıvti laboratorııalyq jumystardy júrgizetin keshendi tartý etti. Onyń kómegimen hımııa, bıologııa, fızıka pánderin júrgizýge bolady. 

 

Bul keshenniń ereksheligi sol, onda oqýshylar esh alańsyz hımııalyq reaksııalardy júrgizip, kompıýter arqyly fızıka men matematıka pánderinen ártúrli synaq jumystaryn jasaı alady. Búginde bul keshenniń Qazaqstanda da, shetelder de birde bir analogy joq. 

 

Sporttyq-shyǵarmashylyq baıqaýdyń aqtyq kezeńinde baıqaýdyń ótýine úlken úles qosqan Búkilálemdik Armreslıng Federasııasynyń Qurmetti Vıse-Prezıdenti jáne Azııanyń gir sporty federasııasynyń prezıdenti, Muhamedolla Aǵzamov, Kókpekti aýdanynyń Qurmetti azamaty, eńbek jolyn aýyl sharýashylyǵy salasyn basqarýǵa arnaǵan Qurıbaı Sultanov qatysty. Sondaı-aq sportshylarǵa qoldaý kórsetý úshin aýdannyń burynǵy ákimi Atymtaı Abenov, aýdannyń Qurmetti azamaty Jaqsylyq Frýnze syndy basqa da jerlester keldi. Osylaısha, olar baıqaýdyń ótýine qoldan kelgenshe kómek kórsetti.