Tarazda týrıstik avtobýstardyń jumysy júıeli jolǵa qoıylǵan

Jambyl oblysynda Taraz qalasy men qala aýmaǵyndaǵy tarıhı-mádenı eskertkishterge qatynaıtyn týrıstik avtobýs iske qosyldy. Jastar jyly qarsańynda «Rýhanı jańǵyrý» baǵdarlamasy aıasynda júzege asqan bul avtobýstar týrıster suranysyna ıe baǵyttarǵa saı marshrýttarmen júredi dep jazady Qamshy.kz aqparat agenttigi. 

Endi kezekte jyl sońyna deıin Taraz qalasynyń turǵyndary men qonaqtary úshin senbi, jeksenbi jáne memlekettik meıram kúnderi turaqty túrde 2 avtobýs týrıstik avtobýs qyzmet kórsetpek. Ári bul avtobýstar tutynýshylaryna aqysyz qyzmet kórsetedi. Týrıstik avtobýstyń alǵashqy baǵytymen saparǵa kóp balaly otbasylardyń músheleri, áleýmettik jaǵdaıy tómen azamattar attandy. Taraz qalasy mańyndaǵy tarıhı-mádenı eskertkishterge týrısterdi jetkizetin kólik quralynyń biriniń syıymdylyǵy 55 oryndyq bolsa, endi biri 18 jolaýshynyń dittegen jerine jetkizýdi kózdeıdi. 2000 jyldan astam tarıhy bar kóne shahar aýmaǵynda týrıster qyzyǵatyn oryndar az emes. Sonyń biri mahabbat pen súıispenshilik, adaldyq jaıyndaǵy ańyzdyń basty keıipkerine aınalǵan Aısha bıbiniń kesenesi. Qapy da jylan shaǵyp óltirgen súıgenine arnap Qarahan Áýlıe turǵyzǵan kesene búginde týrıstermen birge táý ete kelýshilerdiń ordasyna aınalǵan. Sondyqtan da týrıstik marshrýttyń alǵashqy baǵyty «Aısha bıbi» kesenesi dep atalady. «Kóne Taraz» ashyq aspan astyndaǵy murajaıynan bastalatyn bul baǵytta týrıstik avtobýs jolaýshylary «Qarahan» mavzoleıi, Dáýitbek kesenesi, erte dáýirdegi ıslam meshiti, «Qalı Júnis» monshasy, ortaǵasyrlyq «Tórtkúl » kerýen saraıymen birge Qazaq handyǵyna 550 jyl eskertkishi, Aısha bıbi, Babadja hatýn kesenelerin aralap kórý múmkindigine ıe bolady.

Sol sekildi týrıstik avtobýs jolaýshylary qurylysynyń erekshelikterin ǵalymdar Egıpettegi pıramıdalarymen salystyratyn Aqyrtas keshenin sáýlettik erekshelikterimen de tanysa alady. T.Rysqulov aýdanyndaǵy «Aqyrtas» keshenine baǵyt túzeıtin týrıstik avtobýs eń áýeli Taraz qalasy aýmaǵyndaǵy «Qarahan» mavzoleıi, Dáýitbek kesenesi, erte dáýirdegi ıslam meshiti, «Qalı Júnis» monshasy, ortaǵasyrlyq «Tórtkúl » kerýen saraıyna barady. Munan soń sapar baǵyty «Tekturmas» kesenesinen «Aqyrtas» keshenine qaraı aýysady.