Jambyldyq dárigerler ashyq dıalogqa daıyn

Jambyl oblysy ákimdiginiń densaýlyq saqtaý basqarmasy basshysy Marat Jumanqulov densaýlyq saqtaý salasyndaǵy úkimettik emes uıymdardyń ókilderimen kezdesý ótkizdi dep jazady Qamshy.kz aqparat agenttigi. 

Basqosý barysynda halyqty dári-dármekpen qamtamasyz etý, medısınalyq qyzmetterdiń sapasy men qoljetimdiligin arttyrý meseleleri qaraldy. Kezdesýde sóz alǵan Jambyl oblysy boıynsha «Azamattyq Alıans» Assosıasııasy zańdy tulǵalar birlestiginiń tóraǵasy Zaır Iýldashev, jınalǵandarǵa basqosýdyń mańyzdylyǵy jáne densaýlyq saqtaý basqarmasymen birlesip kóptegen máselelerdiń sheshimin tabýǵa bolatynyn aıtty

Kelesi kezekte oblystyń bas dárigeri jıynǵa qatysýshylarǵa densaýlyq saqtaý júıesinde atqyrylyp jatqan jumystar týraly aıtyp berdi. Atap aıtqanda, ol alǵashqy medısınalyq kómekti jaqsartý jónindegi sharalar týraly, kadrlar tapshylyǵy máselesin sheshý, mamandardy shetelde oqytý, jańa medısınalyq nysandar salý jáne aýrýhanalyq sektordy ońtaılandyrý týraly keńinen toqtaldy. Sóz sońynda Marat Jumanqulov úkimettik emes uıymdardyń ókilderine «Biz qashan da sizderdiń salaǵa qatysty suraqtaryńyzdy, usynys-pikirlerińizdi tyńdaýǵa, sheshimin tappaı jatqan máselelerdi sheshýge daıynbyz, biz dıalogqa ashyqpyz», - dedi.

Oblystyq densaýlyq saqtaý basqarmasynyń basshysyna alǵashqylardyń biri bolyp «Nur bala» qoǵamdyq birlestiginiń tóraıymy Áıgerim Dáýletbaeva gınekologtyń qabyldaýy kezinde kóterý kreslosyna muqtaj arbadaǵy áıelderdiń máselesin tilge tıek etti. Olarǵa mundaı arnaıy jabdyqqa tapsyrys berse degen tilekterin jetkizdi. Sonymen qatar, ol emhanalarda genetık jáne mammolog sııaqty dárigerlerdiń qabyldaýymen múgedek áıelderge arnalǵan «Ashyq esik kúnderin» ótkizýdi surady.

Jambyl oblysy Qazaqstan halqy Assambleıasy Analar keńesiniń tóraıymy Muhabbat Mırajapovanyń ótinishi medısınalyq qyzmetterdiń sapasy men qoljetimdiligin arttyrýǵa arnaldy. Ol aýdandyq emhanalarda eresekter men balalarǵa jeke, arnaıy dárigerler bólinse degen usynys aıtty.

Kezdesý barysynda oǵan qatysýshylar densaýlyq saqtaý salasynyń jaǵdaıy týraly óz pikirlerin bildirdi jáne salada qordalanǵan birqatar máselelerdi sheshý boıynsha usynystaryn ortaǵa saldy. UEU men densaýlyq saqtaý basqarmasy arasyndaǵy mundaı kezdesýler aldaǵy ýaqytta turaqty túrde uıymdastyrylyp turatyn bolyp bekitildi.