Almatyda qala turǵyndarynyń qatysýymen "Fıtnes-Park-Medeý" sharasy ótti

2019 jyldyń 25 tamyzynda Almaty qalasynyń Medeý aýdanynda 28 gvardııalyq-panfılovshylar atyndaǵy saıabaqta júzdegen almatylyqtardyń qatysýymen ashyq aspan astyndaǵy "FITNES-PARK-MEDEÝ" jappaı tańerteńgilik dene-shynyqtyrý sharasy ótti dep habarlaıdy Qamshy.kz aqparat agenttigi. 

Halyqty turaqty túrde sportpen shuǵyldanýǵa baýlý jáne jastar arasynda salaýatty ómir saltyn nasıhattaý maqsatynda Medeý aýdany ákimdiginiń uıymdastyrýymen ótken tańerteńgilik jappaı jattyǵýǵa 6 jastan bastap 85 jasqa deıingi qala turǵyndary men qonaqtary qatysty.

Sporttyq shara qatysýshylary aldymen armreslıng, ıoga, djampıng, krossfıt, djıýdjıtsý, boks syndy sport túrlerinen uıymdastyrylǵan kásibı sportshylardyń sheberlik synyptaryna  qatysty. Sharaǵa Brazılııadan kelgen arnaıy qonaq djıýdjıtsý boıynsha álem chempıony, Brazılııa chempıony, qara belbeý ıegeri Erıklı Sılva qatysyp, jas sportshylarǵa erejesiz jekpe-jektiń qyr-syryn úıretti.

Shara sońy arnaıy shaqyrylǵan jattyqtyrýshylardyń jetekshiligimen bir mezette jasalǵan tańerteńgilik jattyǵýǵa ulasty. .

Belsendi qatysýshylarǵa qalamyzdyń "FIGHT CLUB KZ", "Adrenaline", "IDOL", "Aýra" Ioga jattyǵý zaldaryna tegin joldamalar taratyldy.

Uıymdastyrýshylardyń aıtýynsha shara óz jalǵasyn tabady, kelesi ashyq aspan astyndaǵy tańerteńgilik jattyǵý 2019 jyldyń 15 qyrkúıeginde Ortalyq mádenıet jáne demalys saıabaǵyndaǵy "Spartak" stadıonynda ótedi.