Jambyl oblysynda Qordaı batyr qoıylǵan eskertkish qasıetti orynnyń biri

Jambyl oblysynda Elbasy Nursultan Nazarbaevtyń «Bolashaqqa baǵdar: rýhanı jańǵyrý» maqalasynda tapsyrylǵan «Qazaqstannyń kıeli jerleriniń geografııasy» jobasynyń balamaly nusqasy jasalǵan. Onda oblystyń ár qıyryndaǵy birqatar tarıhı-mádenı, arheologııalyq nysandar tizimge alynǵan. Sonyń biri Qordaı batyrǵa qoıylǵan eskertkish. Búginde jergilikti turǵyndar arasynda tutas bir aýdanǵa aty berilgen batyrǵa qatysty ańyz-áńgimelerdiń birneshe nusqasy aıtylady dep jazady Qamshy.kz aqparat agenttigi. 

Qazaqtyń táýelsiz memleket bolyp qalyptasý tarıhynda eren erligimen, kózsiz batyrlyǵymen eldiń esinde qalǵan tulǵalar jeterlik. Sonyń biri de biregeıi Qordaı batyr. Sonaý birtutas qazaq uǵymy paıda bolmaǵan I-II ǵasyrda ómir súrgen batyr Asıbı degen el bıleýshisiniń senimdi serigi bolǵanǵa uqsaıdy. Patsha ámirimen Qordaı batyr shyǵystan keletin jaýǵa toıtarys berýdi mindetine alǵan. Qordaı batyr sekildi Aspara, Atar syndy qolbasshylar eldiń irgesin basqan jaý jolyna qarsy tura bilgen.

Ańyzdarda Qordaı batyrdyń dene bitimi óte iri bolǵandyǵy aıtylady. Batyrdyń tulǵaly, alyp bolǵanyn tabanynyń kóleminen baıqaýǵa bolady. Qazirgi tańda Qordaı batyrǵa ornatylǵan eskertkish mańynda onyń izi qalǵan tas bar. Bul bas betindegi batyrdyń izine qatysty túrli joramaldar aıtylady. Sonyń birinde bıik shoqynyń ústindegi tasqa shyǵyp, jaýlarynyń kele jatqanyn kórgen batyr ashýǵa býlyqqan sátte tastyń betine aıaǵynyń izderi qalǵany týraly baıandalady.

Qordaı batyr óziniń jaýjúrektiliginen bólek aılakerligimen de jaýǵa toıtarys bere bilgen tulǵa. Qazirgi Jambyl oblysynyń aýmaǵyndaǵy Hantaý bókterin jaý shapqan kezde, Shýdyń batys jaǵynan Aspara batyr, shyǵystan Qordaı batyr ekeýi aqyldasa kelip, jaýdyń qalyń qolyn qyryp salǵan desedi. Qapııada qos batyrǵa qarsy amal jasaı almaǵan jaý áskeriniń qyp-qyzyl qany Hantaý taýynyń bókteri men saı-salasynan josyla aǵypty. Osy bir oqıǵadan soń sol taýdyń aty «qantaý» atalyp ketken. Ony búginde halyq Hantaý dep ataıdy.

El basyna kún týǵan shaqta halqyna qorǵan bolyp bilektiń kúshimen, aılakerigimen amal jasaǵan Qordaı batyrdyń eskertkishi qazirgi Qordaı aýdany, Almaty-Qordaı kúre jolynyń 171 shaqyrymyndaǵy Qordaı asýyna qoıylǵan. Eskertkish 2002 jyly qyzyl granıt tastan kólemdi etip jasalyp, tas tuǵyrdyń ústine ornatylǵan. Bul eskertkish el aýmaǵyndaǵy táýelsizdik pen azattyq jolynda janyn pıda etken batyrlarǵa qoıylǵan eskertkishterdiń bir parasy ǵana.