Jambylda áleýmettik kómek alyp, kásip ashýǵa kúsh salatyndar kóp

Búginde Jambyl oblysynda 32,5 myń otbasy ataýly áleýmettik kómek alady. Olardyń arasynda taǵaıyndalǵan kómektiń 3 aılyq somasyn aldyn-ala alyp jeke qosalqy sharýashylyǵyn damytýǵa kúsh salǵandary barshylyq. Bir ǵana Jýaly aýdanynyń ózinde 5 otbasy ataýly áleýmettik kómek taǵaıyndalǵan sátten onyń 3 aılyq somasyn aldyn ala alýǵa ótinish bergen dep jazady Qamshy.kz aqparat agenttigi. 

Jýaly aýdandyq jumyspen qamtý ortalyǵynyń dırektory Sábıthan Qojanov bul bastama týraly usynys kómek alýshy otbasylardyń ózinen túskenin aıtady.

–Jaz aılarynda jumyssyz júrgen jandar úshin maýsymdyq jumystar kóbeıedi. Ásirese egis alqaptarynda jıyn-terim bastalǵannan kúndik aqyǵa kelisip, bala-shaǵanyń nápaqysyn aıyryp júrgender bar. Olardyń arasynan ataýly áleýmettik kómek taǵaıyndalǵan otbasylardyń múshelerin de kóptep keziktiresiz. Sáıkesinshe kúndelikti azyq-túligine qajetti qarjy tabylyp turǵan soń ataýly áleýmettik kómektiń 3 aılyq somasyn aldyn ala alyp, jeke qosalqy sharýashylyqty damytýǵa kúsh salǵandardyń esebi túgel. Kómek taǵaıyndalǵan sátten túsken mundaı ótinishter aýdan ákimi janyndaǵy arnaıy komıssııada qaralýda,–deıdi ortalyq dırektory.

Al osynaý múmkindikti ońtaıly paıdalanǵan nurlykenttik Aıda Jaqashova buzaýly sıyr alǵaly bala-shaǵanyń aqqa aýzy tıgenin aıtady.

–Maǵan ataýly áleýmettik kómek mamyr aıynda taǵaıyndaldy. Sol sátte bul kómekti bir jolǵy tólem retinde alýǵa bolatynyn bilip, tıisti oryndarǵa ótinishpen shyqtym. Nátıjesinde 177 myń teńge qarjyǵa qol jetkizip, oǵan 1 buzaýly sıyr satyp aldym. Árıne jalǵyz sıyrdyń súti balalardyń ishkenin artylmaıdy. Biraq bizge sonyń ózi úlken olja.

Búginde memleket tarapynan ataýly áleýmettik kómek taǵaıyndalǵan otbasylardyń turmysyn tikteýdiń barlyq múmkindigi qarastyrylyp jatyr. Meniń ózim «Jumyspen qamtý 2020» baǵdarlamasy boıynsha Taraz qalasynda júrgizýshilik kýrstan óttim. Munyń barlyǵy túptep kelgen áleýmettik kómek muqtaj jandardyń birte-birte óz qoly óz aýzyna jetýine jasalyp jatqan jaǵdaı jaqsy ekenin túsinemiz, –deıdi A.Jaqashova.

Al atalǵan aýdanǵa qarasty Shaqpaqata aýyldyq okrýginde 257 otbasyǵa ataýly áleýmettik kómek taǵaıyndalǵan. Olardyń arasynda da áleýmettik kómektiń 3 aılyq somasyn aldyn ala alyp, jeke qosalqy sharýashylyqty jolǵa qoıǵandary bar. Máselen 5 balanyń anasy Tolǵanaı Tájibaeva 300 myń teńgege 10 bas qoı satyp alypty.

–Jasyratyny joq járdemaqyny aı saıyn alsam usaq-túıek nársege jaratylyp keter edi. Sondyqtan da onyń 3 aılyq somasyn aldyn ala alýǵa bel býdym. Qazir 10 qoıdy bordaqylap otyrmyz. Olardy kez kelgen ýaqytta qajetine qaraı satýǵa da bolady ǵoı. Sol sebepten de ataýly áleýmettik kómekti bir rettik tólem retinde taǵaıyndaý tájirıbesiniń bereri mol ekendigine senimdimin. Qazirdiń ózinde bizdiń aýylda osy júıemen jeke

qosalqy sharýashylyǵynyń boıyna qan júgirtýdi josparlap júrgender, –deıdi T.Tájibaeva.