"Nur-Otan" partııasyn jandandyram deý bos áýre" 

"Nur-Otan" partııasy qaıta jańǵyrý prosesine daıyn emes. Oǵan eshqandaı da alǵy sharttar joq. Al ákimshilik-ámirlik pármenmen, buıryq-nusqaýmen ondaı sharýalar júzege asyrylmaıdy" – deıdi jýrnalıst Muhtar Túmenbaı óziniń  feısbýktaǵy paraqshasynda .

1) Partııanyń paıda bolý tabıǵatynyń ózi teris. Esterińizde bolsa "Nur-Otan" bılikke tartysty kúrestiń arqasynda kelgen joq. Ony uıymdastyrýshylar partııa qurmastan buryn-aq bılik basynda bolǵan. Al dıalektıka zańynda bári kerisinshe bolýy tıis. Aldymen partııa qurylady, sodan soń ol partııa tartys báseke negizinde bılikke jetedi. Shynaıy kúreste shynyqpaǵan partııa eshqashan da ómirsheń bolmaıdy. Bul da dıalektıka.

2) 20 jyldan astam ýaqyt ishinde bul partııanyń birde-bir básekege qabiletti sparıng partnery bolǵan joq. Saıası alańda jalǵyz ózi dop teýip, ózimen-ózi oınap júrgeni sol. Al konkýrensııa joq jerde damý qaıdan bolsyn!

3) Partııa jumysy vertıkaldy basqarý negizinde qurylǵan. Basshy ne aıtty – sol zań. Aýdandyq partııa fılıalynda aýdan ákimi, qalada qala ákimi, oblysta oblys ákimi, ortalyq apparatta Elbasy jetekshi. Mundaı formatta pikir plıýralızmi bolmaıtyny anyq. Árıne, "Men basshymyn, al sen aqymaqsyń" degen ortada pikirtalas atymen bolmasy belgili. Al pikirtalas joqta jańa, tyń ıdeıalar týmaıdy.

4) Bul partııa el ishinde qolaıly saıası-áleýmettik ahýal qalyptasýynyń negizinde paıda bolǵan joq. Ol tek demokratııalyq elderdiń yqpalynyń nátıjesinde iske qosylǵan format. Ol kezde halyq ta partııalyq júıege daıyn emes edi. Al keıin es jıyp, tájirıbe jınaqtaǵanda oppozısııalyq partııalardyń damýyna shekteý qoıyldy. Sóıtip "Nur-Otan" saıası alańda qaıtadan jalǵyz ózi qaldy. Bıliktiń batasymen qurylǵan Aq jol, Aýyl, Rýhanııat sııaqty oıynshyq partııalardy esepke alýdyń ózi qısynsyz.

5) Búgingi tańǵa deıin paramen ustalǵan, sybaılastyq jemqorlyqqa jol bergen memlekettik qyzmetkerlerdiń 100% "Nur-Otan" músheleri. Olardyń sany búginde myńdap sanalady. Munyń ózi partııanyń avtorıtetine orny tolmas nuqsan keltirdi. Al osy ýaqyt ishinde el aldyna shyǵyp sol paramen ustalǵandardy aıyptap sókken tym quryǵanda bir aımaqtyq partııa basshysyn kórdińizder me. Bular partııa atyna kir keltirdi dep, attaryn atap, tústerin tústegen, mundaılarmen bizdiń jolymyz birge emes dep joǵarǵy minberlerden sóılegen bireýi boldy ma? Joq. Bolǵan joq. Bul da, joǵaryda aıtyp ketken vertıkaldy basqarý júıesiniń saldary. Birde bir partııa fýnksıoneri joǵary jaqtyń ruqsatynsyz bireýdi synamaq túgili jaq ashpaıdy. Al negizinde, óz abyroıyn oılaǵan kez kelgen saıası uıym árbir osyndaı fakti boıynsha málimdeme jasap, óz pozısııasyn bildirip otyrady jáne mundaı jaǵdaılardy boldyrmaýdyń amaldaryn izdeıdi. "Nur-Otanda" ondaı praktıka atymen joq. Demek partııada uıymnyń abyroıyna nuqsan keletin ınfeksııalardan emdeletin ımmýnıtet qalyptaspaǵan. Halyq arasynda partııanyń bedeliniń bolmaýy – sonyń jemisi.

6) "Nur-Otan" jańa lıderlerdi ósirip baptap, tárbıelep shyǵara almaıtyn dárejege jetti. Onyń da sebebi jańaǵy vertıkaldyq basqarý júıesinde jatyr. Alǵashqy partııalyq uıymdarda bedel jınap, halyqpen qoıan-qoltyq jumys istep shynyqqan, sol part. ıacheıkanyń usynysymen, aımaqtyq saılaý arqyly ósip, ortalyq organǵa deıin jetken bir atqaminerdi kórsetińizdershi. Joq ondaılar. Sebebi barlyq basshy fýnksıonerler joǵarydan taǵaıyndalady. Nemese halyqqa syıly-aý degenderdi aldap-sýlap, taqa bolmasa kúshtep partııaǵa kirgizedi. Biraq olardan da paıda shamaly. Sebebi ol rekrýttar óz isiniń tamasha mamany bolǵanymen, partııalyq sharýada nól. Golovkın men Sapıevyń da sol, Dımashyń men Qaıratyń da sondaı. Al kadr saıasatynda mundaı tapshylyqqa dýshar bolǵan uıymnyń bolashaǵy qandaı bolmaq? Jaýabyn men aıtpasam da túsinip otyrǵan shyǵarsyzdar.

Qysqasy "Nur-Otan" partııasy qaıta jańǵyrý prosesine daıyn emes. Oǵan eshqandaı da alǵy sharttar joq. Al ákimshilik-ámirlik pármenmen, buıryq-nusqaýmen ondaı sharýalar júzege asyrylmaıdy.