Stýdentter aıyna 250 myń teńge tóleıtin jumysta istegisi keledi

"Qazaqstannyń eń tartymdy jumys berýshileri" reıtıngin jasaıtyn halyqaralyq Universum kompanııasy jastardyń qaıda jumys istegisi keletinin anyqtaý úshin zertteý júrgizdi, – dep habarlaıdy Qamshy.kz aqparat agenttigi forbes.kz-ke silteme jasap.

Reıtıng nátıjesi kórsetkendeı, stýdentterge jumys berýshiniń turaqtylyǵy men senimdiligi mańyz ıe. Áleýmettik zertteýge 2018 jyldyń qarashasy men 2019 jyldyń sáýiri aralyǵynda 98 joǵary oqý ornynyń 9936 stýdenti arasynda júrgizilgen pikirterim nátıjesi negiz etip alynǵan. Respondentterdiń 44 paıyzy ul, 56 paıyzy qyz bala. Suralǵandardyń 30 paıyzy – Bıznes/Kommersııa, 17 paıyzy – Injınırıng, 10 paıyzy – IT, 11 paıyzy – jaratylystaný ǵylymdary, 20 paıyzy – gýmanıtarlyq ǵylymdar, óner, bilim berý, 6 paıyzy – quqyq, taǵy 6 paıyzy – densaýlyq saqtaý salasynda qyzmet etkisi keletinin aıtqan. Saýalnamaǵa qatysqan stýdentter oqý ornyn bitirgen soń qoldaryna alǵysy keletin jalaqynyń ortasha kólemi 255 230 teńgeni quraıdy.

Universum uıymyndaǵylar bul zertteýler jumys berýshiler úshin qyzmetkerlerdi basqarý strategııasyn qurýǵa jáne brendpen jumys isteýge kómektesetindigin atap ótti.

Stýdentter arasynda meılinshe tartymdy salalar qataryna tómendegiler kiredi: týrızm, qonaqjaı bıznesi – 17%, óner, oıyn-saýyq, demalysty uıymdastyrý – 16%, memlekettik sala men úkimettik qyzmet – 15%, bank salasy – 14%, bilim berý jáne ǵylymı ordalar – 13%.

Zertteý barysynda anyqtalǵandaı, jastar úshin jumys berýshiniń joǵary jalaqy tóleıtini, kompanııanyń naryqtaǵy tabystylyǵy, kásibı damýǵa, joǵary ónimdilikke múmkindiktiń bolýy, issapar, shetelde qyzmet etý syndy erekshelikter asa mańyzdy.