Jambylǵa májilis depýtaty jumys saparymen keldi

Qazaqstan Respýblıkasy Parlamenti Májilisiniń depýtaty, "Nur Otan" partııasy depýtattyq fraksııasynyń múshesi Marat Bopazov Jambyl oblysynda jumys saparymen bolyp, aýdandardy aralady dep jazady Qamshy.kz aqparat agenttigi. 

Marat Dáribekulynyń jumys sapary aldymen Baızaq aýdanyndaǵy Qyzyl juldyz aýyldyq okrýginde ornalasqan "Rola-7" jaýapkershiligi shekteýli seriktestiginiń tynys-tirshiligimen tanysýdan bastaldy. On jyldan astam ýaqyttan beri makaron, kespe, jaıma, chabres jáne un ónimderin óndirýmen aınalysyp kele jatqan seriktestik búginde bir júz otyzdan astam adamdy jumyspen qamtyp otyr. Táýligine otyz tonna un jáne makaron ónimderin shyǵaratyn ujym óz ónimderin el aýmaǵynan bólek Reseı men Qyrǵyzstan eline eksporttap keledi. О́tken jyly "Kepildeme" tetigi boıynsha "Reseı jınaq banki" AQ-nan aınalym qoryn tolyqtyrýǵa 60,0 mıllıon teńge qarjy alǵan. Atalmysh seriktestik "Bıznestiń jol kartasy - 2020" baǵdarlamasynyń arqasynda 2016 jyly "Paıyzdyq stavkany sýbsıdııalaý" tetigi arqyly "Halyq banki" AQ-ynan on tórt paıyzben jalpy somasy 165,5 mıllıon teńge nesıe alyp, seh qurylysyn turǵyzyp, oǵan kerekti qural-jabdyqtar satyp alǵan.

Májilismen toqtaǵan kelesi nysan kókónis, alma, dándi daqyldar, mal azyǵy, et pen sút, shujyq jáne sút ónimderin shyǵarýmen aınalysatyn "Agalı" sharýa qojalyǵy boldy. Munda sút sehynyń jumys barysyna kýá bolǵan Marat Bopazov sharýalardy tolǵandyryp júrgen máseleler tóńireginde suhbattasty. Sharýa qojalyq jetekshisi Nabı Agalıev qosalqy sharýashylyq arqyly atqarylǵan jumystar, aldaǵy josparlarymen bólisti.

Halyq qalaýlysy budan soń jeke kásipker Vladımır Lesnıaktyń "Molochnyı bıdonchık" sút óńdeý sehyna bardy. Sút, aıran, qaımaq, maı, irimshik, súzbe, ıogýrt syndy sút ónimderiniń on segiz túrin shyǵarýmen shuǵyldanatyn sehta búginde onǵa tarta adam eńbek etedi. Sapaly ónimge suranys joǵary bolǵandyqtan bolar, mundaǵy óńdelgen ónimder Almaty men Taraz qalalary jáne oblys aýmaǵyndaǵy balabaqshalar, emdeý mekemelerine, sondaı-aq, ortalyq bazarlar men saýda oryndaryna shyǵarylýda eken.

Depýtat Marat Dáribekuly ózi aralaǵan ujymdardaǵy qaınaǵan tirlikke razy bolǵandyǵyn jetkizdi. «Mańyzdysy halyqtyń áleýmettik jaǵdaıynyń jaqsy bolýy. Bári de ózimizdiń qolymyzda. Sol úshin sanamyzdy ózgertip, eńbektene bilýimiz kerek»,-degen májilismen sharýalar qaýymynyń eńbekterine tabystar tiledi.