Jambylda turǵyndardyń talap-tilegi tyńdaldy

"Nur Otan" partııasy «Halyqqa kómek» partııalyq jobasy aıasynda qoǵamdaǵy ózekti máselelerdi der kezinde ári tıimdi sheshý úshin qoǵamdyq qabyldaý bólmeleri «jedel ári bir jerde» qaǵıdasymen jumys isteý formatyna kóshken dep jazady Qamshy.kz aqparat agenttigi. 

“Nur Otan” partııasy Jambyl oblystyq fılıaly qoǵamdyq qabyldaý bólmesiniń meńgerýshisi Úmitbala Ibraımova partııanyń Baızaq aýdandyq fılıalyndaǵy qoǵamdyq qabyldaý bólmesinde azamattardy jeke qabyldap, muń-muqtajyn tyńdady.

Qabyldaýǵa birinshi bolyp Qyzyl juldyz aýylynyń turǵyny Gúljamal Esetova keldi. Ol maýsym jáne shilde aılarynda taǵaıyndalǵan ataýly áleýmettik kómektiń, ıaǵnı 129 myń teńgesin alǵandyǵyn, alaıda múgedek balalaryn emdetý úshin Taraz qalasyna kóship ketkendigin, atalǵan qarajatty qaıtara almaǵandyqtan, kómek berýin surandy. Aýdan ákimdiginiń jumyspen qamtý jáne áleýmettik baǵdarlamalar bóliminiń sektor meńgerýshisi Darıǵa Býrhanova ataýly áleýmettik kómek «Memlekettik ataýly áleýmettik kómek týraly» Zańǵa sáıkes tólenetindigin jáne ótinish ıesi usynǵan derekterge ózgerister týyndaǵan jaǵdaıda, 10 jumys kúni ishinde ýákiletti organǵa habarlaý qajettigin aıtty.Ol sonymen birge zerdeleý barysynda ótinish ıesiniń atalǵan mekenjaıda turmaıtyndyǵy anyqtalǵanyn, ýákiletti organnyń sheshimimen taǵaıyndalǵan kómektiń sommasy qaıta qaralyp, eki aıy zańsyz dep eseptelip, bıýdjetke keri qaıtarý týraly atalmysh Zańǵa sáıkes túsindirdi.Bul máselege qatysty oblystyq máslıhattyń depýtaty Baqytjan Seıtkarımov quqyqtyq keńes berdi.

Sarykemerlik 9 balanyń anasy Sandýǵash Shahshambaeva «Qareket» qory arqyly 2 bólmeli páter alǵandyǵyn, bólmeler tar bolǵandyqtan, qosymsha qurylys júrgizý jaıyn kóterdi. Qostóbelik Indıra Ýteshova 5 balany jalǵyz tárbıelep otyrǵandyǵyn, jaldamaly páter taba almaı júrgendigin jetkizdi. Jańatas qalasynda tirkelgendikten, ataýly áleýmettik kómekke qoly jetpeı otyrǵanyn, sonymen qatar, kámelet jasyna jetken balasyna jeke kýálik alýyna yqpal etýin surandy. Qostóbe aýyldyq okrýgi ákiminiń orynbasary Nurǵalı Qojabergenov kópbalaly anaǵa jaldamaly páter tabýyna kómek beretindigin aıtty.

Qabyldaýǵa kelgen azamattardy muqııat tyńdaǵan Úmitbala Serikqyzy olardyń ótinishteri aıaqsyz qalmaıtyndyǵyn jetkizdi.