Jambyldyqtar "Atameken" kishi baǵdarlamasyn oryndaýǵa belsene atsalysyp jatyr  

Jambyl oblysynda «Rýhanı jańǵyrý» baǵdarlamasy qabyldanǵan 2 jyl ishinde jalpy somasy 2 mıllıard teńge bolatyn 129 joba men 13 is-shara uıymdastyryldy. Al jyl basynan beri «Týǵan jer» baǵdarlamasynyń «Atameken» kishi baǵdarlamasymen somasy 828 mıllıon teńgeni quraıtyn 59 joba júzege asyryldy dep jazady Qamshy.kz aqparat agenttigi. 

Elbasy Nursultan Nazarbaevtyń «Bolashaqqa baǵdar: rýhanı jańǵyrý» maqalasynda «Týǵan jer» baǵdarlamasyn qolǵa alýdy usynǵan edi. Bilim berý salasynda aýqymdy ólketaný jumystaryn júrgizý, ekologııany jaqsartý men eldi mekenderdi abattandyrý, sondaı-aq eskertkishter men mádenı nysandardy qalpyna keltirýdi jáne týǵan jerin umytpaı, oǵan qamqorlyq jasaǵysy kelgen kásipkerlerdi, sheneýnikterdi, zııaly qaýym ókilderine jol ashý syndy mańyzdy mindetterdi kózdegen baǵdarlama maqsatyn jambyldyqtar da jaqsy túsindi.

Atalmysh maqala jaryq kórgennen bergi aralyqta oblys aýmaǵynda odan týyndaǵan mindetterdi júzege asyrý maqsatynda birqatar jumystar qolǵa alyndy. Máselen «Týǵan jer» baǵdarlamasy aıasynda 2 mıllıard teńge kóleminde 129 joba, 13 is-shara uıymdastyryldy. Demeýshilerdiń qamqorlyǵymen 4 turǵyn úı, 8 páter, 11 sport nysany, 2 alleıa, 1 mýzeı, 1 medısınalyq pýnkt halyq ıgiligine berildi. Sol sekildi ınfraqurylymdy damytý, áleýmettik kómek syndy jobalar da júzege asyryldy. Jyl basynan beri «Rýhanı jańǵyrý» baǵdarlamasynyń «Atameken» kishi baǵdarlamasy arqyly óńirde jalpy somasy 828 mıllıon teńge bolatyn 59 joba iske asty.Munda qoly ashyq, atymtaı jomarttar esebinen 24 turǵyn úı, 2 saıabaq, 3 balabaqsha, 4 sporttyq nysan, 2 meshit paıdalanýǵa berildi. Birqatar aýdandarynda az qamtylǵan jáne kópbalaly otbasylar kópten kútken baspana baqytyn sezinýge múmkindik aldy. Al Talas aýdanynda uzaq jyldar boıy jergilikti turǵyndardyń bas aýrýyna aınalǵan kóshelerdi abattandyrý, jaryqtandyrý jumystary júrgizildi.

Jyl sońyna deıin oblys aýmaǵynda jalpy somasy 1,4 mıllıard teńge bolatyn 29 jobany júzege asyrý josparlanyp otyr. Shyndyǵynda bul jumystardy jınaqylyqpen jáne júıelilikpen iske asyrýda jambyldyqtar Elbasy kózdegen talaptyń údesinen shyǵa alatyndyǵyna kúmán joq.