Baıbek Almaty kóshelerindegi qozǵalys jyldamdyǵynyń ózgerýine qatysty pikir bildirdi

Nur Otan partııasy tóraǵasynyń birinshi orynbasary, Almatynyń burynǵy ákimi Baýyrjan Baıbek Ál-Farabı dańǵyly, Saın kóshesi jáne Shyǵys aınalma avtokólik jolyndaǵy jyldamdyq rejımi ózgerýine qatysty pikir bildirdi dep habarlaıdy Qamshy.kz aqparat agenttigi Tengrinews.kz saıtyna silteme jasap.

"Mende Twitter jáne Instagram jelilerinde paraqshalarym bar, Facebook-ty da oqyp otyramyn. Kez kelgen máselege túrli pikirler aıtylady. Ásirese, ol másele adam ómiri men densaýlyǵyna qatysty bolsa. Sizder Almatynyń adam ólimine ákelgen jol-kólik oqıǵasy sany jóninen tek Qazaqstan boıynsha emes, álem boıynsha da kósh bastap turǵanyn bilesizder me?  Bul Almatynyń ǵana emes, búkil Qazaqstannyń reıtıngin túsiredi", - deıdi Baıbek.

"Jyldamdyqty azaıtý jol qaýipsizdigi tıimdiligin arttyrýǵa baǵyttalǵan basty alty qadamnyń biri. Biz kez kelgen sheshim qabyldaǵan kezde álemdik tájirıbege, zamanaýı trendterge súıenetinbiz. Qaýipsizdik - "Almaty 2020" baǵdarlamasynyń basty baǵyty. Shvesııanyń tájirıbesine súıene otyryp, Vision Zero júıesin engize bastadyq". "Nur Otan partııasyna aýysqanyma eki aı ýaqyt bolyp qaldy. Búginde Almatyny áriptesim Baqytjan Saǵyntaev basqaryp otyr. Sheshimdi qabyldaıtyn da sol, sol aýmaq úshin jaýap beretin de ózi. Qoǵamdyq keńes bar, máslıhat bar. Munda qandaı da bir aqyl-keńes berý artyq bolar dep oılaımyn", - dedi Baýyrjan Baıbek. 

Eske salaıyq, keshe Ál-Farabı men taǵy eki kóshege saǵatyna 80 jyldamdyq rejımi qaıtarylatyny habarlanǵan edi. "Osyǵan baılanysty ákimdik áleýmettiń joǵary suranysyn nazarǵa ala otyryp, ál-Farabı dańǵyly men Shyǵys aınalma avtokólik jolyna saǵatyna ruqsat etilgen 80 shaqyrym jyldamdyqty qaıtarý týraly sheshim qabyldady. Bul osy kóshelerdiń biregeı aınalma jolyna baılanysty mindetterine saı keledi", - delingen Almaty ákimdiginiń baspasóz relızinde.