Jambyl oblysynda jańa oqý jylyna daıyndyq qarqyndy júrip jatyr

Jańa oqý jylynyń bastalýyna da azdaǵan ýaqyt qaldy. Osyǵan oraı Jambyl oblysynyń bilim oshaqtary qyz daıyndyq jumystaryn júrgizýde dep jazady Qamshy.kz aqparat agenttigi. 

Bıylǵy oqý jylynda 442 mektep bilim berý isine kirisedi eken. Atalǵan oqý ordalary 28 myńnan astam baldyrǵandy 1 synypqa qabyldaıdy dep kútilýde.

Qazirdiń ózinde oqýshylardy mektepke qabyldaýǵa arnalǵan eduschool.kz júıesi arqyly 1 synypqa 13 938 elektrondy ótinish berilip, 13 512 bala oqý ordalaryna qabyldanǵan.

Sonymen qatar jańa oqý jylynda oblysta 5 mektep paıdalanýǵa berilgeli otyr. Jańa bilim berý mekemeleri 1 úshaýysymdy, 1 apatty jaǵdaıdaǵy jáne 3 oryn tapshylyǵy bar mekteptiń máselesin tolyqtaı sheshpek.

Al, oblysta tirkelgen apatty jaǵdaıdaǵy 3 mektepke oblystyq bıýdjetten qarjy bólinip, qurylysy bıyl bastalady. 16 mektepti aǵymdaǵy jóndeýden ótkizýge 98 mıllıon teńge bólinip, jumystar tolyq aıaǵyna jetken. 7,3 mıllıard teńgege 7 mektepke kúrdeli jóndeý júrgizilýde. Onyń 3-eýindegi jumystar máresine jetip úlgerdi. Kelesi 3 mekteptegi jóndeý jumystary aıdyń aıaǵyna deıin támamdalady dep kútilýde. Al, Shý aýdanyndaǵy M.Áýezov mektebiniń qurylysy qarashaǵa deıin jalǵasady. Oqý prosesine kedergi keltirmeý úshin oqýshylar bólip oqytylmaq. Birde-bir bala oqýdan syrt qalmaıdy.

Sondaı-aq, oblysta oqýlyq jetispeýshiligi máselesin boldyrmaýdyń joldary da naqtylanǵan. Atalmysh másele Bilim jáne ǵylym mınıstrligi engizgeli otyrǵan arnaıy júıe arqyly sheshilmek. Naqtysyn aıtqanda, jańa júıe boıynsha oqýshylar mektep baǵdarlamasynda paıdalanatyn kez kelgen oqýlyǵyn QR Bilim jáne ǵylym mınıstrliginiń saıtynan júktep alyp, planshet nemese telefon sekildi qurylǵylaryna jazyp ala alady. Osylaısha, oqýshylarǵa da, ata-analar úshin de qajetti kitap árdaıym qoljetimdi bolmaq. «Jeńil portfel» jobasy aıasynda qolǵa alynǵan bastama birinshiden, oqýshylardyń oqýlyq tolǵan aýyr sómkelerin tasý mashaqatynan aıyrsa, ekinshi turǵydan joǵaryda aıtqan oqýlyq jetispeýshiligin sezinbeýine de jol ashpaq.

Jalpy oblys oqýshylaryn oqýlyqpen qamtamasyz etýge oblys ákimdiginen 2,7 mıllıard teńge bólingen. Bul qarajatqa 1 mıllıon 300-den astam kitap satyp alyndy. Qazirgi ýaqytta onyń 92 paıyzy oblysqa jetkizilip úlgerdi. Al mektepterge barlyq oqýlyqtyń 65 paıyzy jóneltildi. Bul jumystar oqý jylynyń basyna deıin tolyq aıaqtalady.