Saqtaıyqshy sol saltty

Bıylǵy jyldyń Qurban aıt merekesi de ótip ketti. Jaǵdaıy bary Mekkege sapar shekti, ózgesi qurbandyq shaldy, endi biri barymen dastarqanyn jaıyp, aıttap kelýshilerdi kútip alyp, shyǵaryp saldy. Al ózgeler úshin ádettegi kúnderdiń birindeı ótip ketti.

Búgingi kúnniń oraza aıtynyń da, qurban aıtynyń da kelbeti ózgeshe. Buryn qandaı edi? Buryn degenim, bizdiń bala kezde. Biz qashan bala boldyq? Shamamen, osydan 10-15 jyl burynǵy jaǵdaıdy aıtsam...

"Búgin eshkimdikine aıttamaı qoıa turaıyq. Bireý-mireý kep qalar úıge" dep bárimiz úıden shyqpaı otyramyz birinshi kúni. Ekinshi kúni aıttaýǵa endi shyǵaıyn dep jatqanda úıinen senen erterek shyqqan bireýler kep qalady. Sóıtip jalǵasa beredi... Buryn solaı edi. Al, búginde, baıqasam, onsha aıttamaıdy eshkim. Bári jumysbasty ma, álde zaýqy joq pa... Tipti kórshilerge de kirmeıdi. Burynǵydaı ma dep bir kórshime "aıt qabyl bolsyn" aıtyp kirip em, tipti dastarhany da jaıylmaǵan. О́zim yńǵaısyzdandym. Nan aýyz tıip, ketip qaldym.

Al, buryn she? Dastarhan jaıylǵan, sháı burqyldap qaınap turady. Qys bolsa peshte sháýgim qaınap, basqa mezgilde toq sháýgimdi qaıta-qaıta qaınatyp, aıtshylardy kútip otyrýshy ek. Anaý kórshi keldi, mynaý kórshi kelmedi. Sol kelýi kerek dep kútesiń. Kútkenderiń keledi. Anaý kórshige bardym, mynaýy qaldy dep jospardaǵy tyndyrý kerek isińdeı mindet bolyp turatyn moınyńda. Ras. Buryn solaı edi. Ol kezde bala em. Ata-anam osylaı isteıtin. Al, biz, balalar jınalyp alyp birge kirip shyǵatynbyz úıdi-úıge. Es bilgen shaqta úıde aıttap kelýshilerdi kútip qalatynbyz. Biz qyzyq kórip, qydyrýdy, kámpıt jeýdi, ananyń úıinen mynany jedim, anany jedim dep aıtý úshin ǵana aıttaıtynbyz. Al, ata-anamyz barǵan úıine aq tilekterin jaýdyryp keletin. Úıge kelgen aıttaýshylar da qury bos kelmeı aq tilekterin birge ala keletin. Ata-anamnyń sol ádetterin kórip óskennen keıin óziń de solaı jasaǵyń keledi eken.

Alaıda, "sen tımeseń men tıme badyraq kóz" dep, ózi eshkimdikine aıttamaıtyn bolǵan soń úıine de eshkim kelmeıtinine senimdi túrde dastarqan jaımaıtyndar da barshylyq. Keıbireýi áıteýir el pisirip jatyr dep arapada pisirgen sanaýly túıir baýyrsaǵyn eshkim kelmeıtinine senimdi bolsa da "bireý kelse" dep saqtap qoıyp otyratyn da adamdar baryna senimdimin...