Kadyrbek Atambaev Facebook jelisindegi óziniń paraqshasynda bas prokýratýra «óz januıasyna tıesili emes múlikti tirkep jibergenin» jazǵan. «Bılik ókilderi aıtqan 120 múliktiń ishindegi 101-i Atambaevqa da, onyń januıasyna da tıesili emes ekenin atap kórsetkim keledi. «KyrgyzAvtomash» birikken aksıonerlik qoǵamy 2007 jyldan beri bizge tıesili emes» deıdi ol.
"Bas prokýratýra meniń ákem Almazbek Atambaevtyń jáne bizdiń týystarymyzdyń tárkilengen múlki máselesinde qoǵam aldynda ádeıi aıla-sharǵy jasaıdy dep sanaımyn. Almazbek Shárshenulyna jáne bizge, otbasyna tıesili delingen 120 dana múlik jaıly málimdeme jasaǵym keledi. Bizdiń otbasy músheleriniń atyna jazylǵan nárse shyn máninde bizge tıesili emes, al medıakeńistikke shyǵyp jatqan jalǵan aqparattar bıliktiń qara pıary dep sanaımyz", - dep málimdedi Qadyr Atambaev.
Kadyrbek Atambaevtyń aıtýynsha, olardyń januıasynda «Kyrgyzstan» bankinde 2002 jyly ashylǵan jalǵyz esep-shot bar. Al «Aprel» telearnasynyń Jalal-Abadta múlki joq. Teleradıo uıymdary qaýymdastyǵy da Atambaevtar januıasyna tıesili emes.
Atambaevtyń uly ákesiniń Koı-Tashtaǵy úıden basqa múlikteri ol prezıdent bolǵanǵa deıin alynǵanyn aıtady. Ol bas prokýratýra dereginde Atambaevtyń múlki retinde atalǵan 1985 jyly qaıtys bolǵan atasynyń úıi de engizilgenine tańǵalyp otyr.
«Ákemiz toqsanynshy jyldardyń basyna bastap kásipker jáne mesenat retinde belgili bolǵanyn eske salǵym keledi. Ol - óziniń jaǵdaıyn memlekettik qyzmette emes, bıznespen aınalysyp júrip jasaǵan adam» deıdi Kadyrbek Atambaev.
Qyrǵyzstan bas prokýratýrasy bıylǵy 16 tamyzda Almazbek Atambaevtyń múlikteri, baǵaly qaǵazdary, aksııalary, banktegi esep-shottary, «Kyrgyzavtomash», «Aprel-TV», «Medıa Forým» kompanııalarynyń múlikterine tyıym salynǵanyn habarlaǵan.
"Men Narıman Tóleevtiń bankinde de qarajatymyz bolǵan degen jalǵan tizimge tańǵaldym. Shyn máninde bizde "Qyrǵyzstan" Kommersııalyq bankinde turǵan shot bar jáne bul shot 2002 jyldan beri bolǵan, ol kezde bank Sharıpa Sadybakasova ıeliginde edi. Bas prokýratýra eldegi barlyq bankti, tipti Pákistannyń Ulttyq Bankiniń fılıaldaryn da atap ótýge sheshim qabyldaǵan sııaqty. Bas prokýratýra barlyq tárkilengen mashınalardyń tizimin jarııalap, olardyń barlyǵy 90-jyldary jáne 2000-jyldary shyǵarylǵanyn jáne sotqa deıin tartyp alynǵanyn moıyndaǵysy kelmeıdi", - dep atap ótti Qyrǵyzstannyń eks-prezıdentiniń uly.
Atambaevtyń advokaty Slesarev tamyzdyń 15-i kúni Azattyqtyń Qyrǵyz qyzmetine bergen suhbatynda qamaýda otyrǵan burynǵy prezıdentke jalpy sany 14 aıyp taǵylǵany týraly málimdegen. Olardyń arasynda bılik ókilderine kúsh kórsetý, jappaı tártipsizdik uıymdastyrý, adam óltirýge oqtalý, kepilge adam alý, zańsyz qarý ustaý jáne jemqorlyqqa baılanysty taǵy birneshe aıyp bar.
Bıyl mamyrda Qyrǵyzstan parlamenti burynǵy prezıdentke tıispeýshilik týraly zańǵa ózgertýler engizgen. 27 maýsymda parlament Atambaevty eks-prezıdent jáne tıispeýshilik mártebesinen aıyrǵan.
Almazbek Atambaev Qyrǵyzstandy 2011-2017 jyldary basqarǵan. 2017 jylǵy qazanda ótken saılaýda ózin qoldaıtyn bılik partııasynyń kandıdaty Sooronbaı Jeenbekov prezıdent bolyp saılanyp, qyzmetin kiriskende Atambaev oǵan batasyn bergen.
Pikir qaldyrý
pikir