Vıse-mınıstr "Pedagog mártebesi týraly" zańnyń qashan qabyldanatyn aıtty

Búgin Nur-Sultanda ótken Tamyz konferensııasynda QR premer-mınıstriniń orynbasary Gúlshara Ábdiqalyqova 2020 jyldyń 1 qańtaryna deıin "Pedagog mártebesi týraly" zań qabyldanatynyn aıtty dep jazady Qamshy.kz aqparat agenttigi. 

"Ýaqyttaryńyzdy kóp almaı, eki máselege toqtalǵym keledi. Birinshi másele - ol prezıdent aıtqan muǵalimderdiń mártebesin kóterý týraly zań. Osy zańdy jaqyn ýaqytta, 1 qyrkúıekke deıin Parlamentke engizýimiz kerek. Sondyqtan mınıstrlikke 1-2 aptanyń ishinde Parlamentke engizý týraly tapsyrma beremin", - dedi Ábdiqalyqova.

Vıse-mınıstrdiń aıtýynsha, "Pedagog mártebesi týraly" zań jobasy elimizdiń barlyq óńirlerinde jan-jaqty talqylanǵan.

"Sondyqtan 1 qańtarǵa deıin bul zańdy qabyldaýǵa negizgi múmkindik bar dep oılaımyn. Ekinshi másele - ol barlyq deńgeıde bilimniń damýy men ǵylymnyń damýy. Osyǵan baılanysty biz 2025 jylǵa deıin bilim men ǵylymdy damytýdyń memlekettik baǵdarlamasyn qabyldaýymyz kerek. Bul baǵdarlama osy jyldyń sońyna deıin tolyq jospary jasalyp, qabyldanýy tıis", - dedi Gúlshara Ábdiqalyqova.

2018 jyly 5 qazanda Qazaqstannyń sol kezdegi prezıdenti Nursultan Nazarbaev halyqqa joldaýynda"Kelesi jyly «Pedagog mártebesi týraly» zańdy ázirlep, qabyldaý qajet dep sanaımyn" degen bolatyn.