Qazaqstandyq parashıýtshiler 21 eldiń ishinde ekinshi oryndy ıelendi

Reseı Federasııasynyń Pskov oblysynda ótip jatqan «Desanttyq vzvod» konkýrsynyń asa qıyn kezeńderiniń biri, desantshylardyń dáldikke jeke sekirý synaǵy boldy. Sekirýler "qanat" klassıfıkasııasyndaǵy basqarylatyn serııalyq parashıýttik júıelerimen jasalyndy. Atalmysh kezeńde 21 eldiń desantshy-parashıýtıstteri tartysqa tústi.

Parashıýtpen dáldikke sekirý Mı-8 tikushaqtarynan 1200-1300 metr bıiktikten oryndaldy. Olardyń sekirý ıntervaldary úsh sekýndti qurap, erkin qalyqtaý jaǵdaıynda da úsh sekýndtan kem bolmaýy tıis bolatyn. Ereje boıynsha parashıýtıstter áskerı kıim úlgide, qarý-jaraqpen jáne desantshylar shleminde bolýy tıisti. Jerge qoný barysynda dıametri 10 metrdi quraıtyn qyzyl sheńberge aıaqtaryn tıgizýi qajet edi. Nátıjeni esepteý sheńberdiń ortasynda ornalasqan qyzyl jastyqshadan júrgizilip otyrdy. Ár elden úsh desantshy sekirip, olardyń sheńber ortasynan aýytqyǵan qashyqtyq mólsheri boıynsha jeńimpazdar anyqtaldy.

Osy kezeńniń nátıjesinde Qazaqstandyq desantshylar ekinshi oryndy ıelendi. Olar Belarýs Respýblıkasy desantshylarynan 50 santımetrge ǵana utyldy, úshinshi oryndy Marokko eliniń áskerıleri ıelendi. Qazaqstandyq desantshylar arasynda úzdik nátıjeni maıor Vıacheslav Loparev kórsetti. Ol sheńberdiń dál ortasyna qonyp, barlyǵyn tań qaldyrdy.

Qazaqstandyq komandanyń nusqaýshy-parashıýtısti maıor Azamat Abdiraıymnyń aıtýynsha, qazaqstandyq parashıýtıster saıystyń osy kezeńine 7 seksııalyq parashıýttik júıesimen daıyndalǵan.

"Alaıdy osy jerge kelgende tóreshiler kollegııasy bizdiń parashıýtterdi sporttyq dep tanyp, ózderiniń 9 seksııaly Arbalet-2 parashıýttik júıesin usyndy. Alaıda soǵan qaramastan, tanystyq sekirýlerdi jasamaı-aq, beıtanys parashıýttermen bizdiń jigitter jaqsy nátıje kórsete bildi", – dep oıymen bólisti.

Esterińizge sala ketsek, qazaqstandyq áskerı qyzmetshiler 3-17 tamyz aralyǵynda Reseı Federasııasynyń Pskov oblysynda halyqaralyq armııalyq oıyndarǵa qatysýda.

Rýstem Igısınov,

 kapıtan

 "Batys" óńirlik qolbasshylyǵynyń baspasóz qyzmeti