Biz máselemen emes, onyń saldarymen ǵana kúresemiz. Nege?

«Bireý tońyp sekiredi, bireý toıyp sekiredi» degen qazaqtyń máteli osy jerpde oraıyn tabatyn sekildi. Túrmesiz turmys quryp, qorasyz mal baqqan qazaqtyń darhan dalasyn qazir kazıno syndy adamdyqtyń azǵyndyq shegin anyqtaıtyn oryndar basyp ketti.

Jasy da, jasamysy da qolyndaǵy qarajatyn qartaǵa salyp, qaltasyn qapmpaıtýǵa qareket qylatyndar kóp. «Áttegen-aı» degizetin jaıttar kóp. Mıllıondardy báske sala qylshyǵy qısaımaıtyn azamattardyń kópshiligi bu báleden aýlaq. Al qolyna qomaqty aqsha ustap kórmegen paqyrlar baryn báske tigip, artynan san soǵyp, barmaq shaınap otyrady.

Qup! Sol kóptiń nalasymen qaldyrǵan aqshasyn «páshkilep» jınap, shalqyp júrgender – oıyn ortalyqtarynyń, býkmekerlik keńselerdiń ıeleri. Olarǵa da ókpe artý qıyn. «Kazıno» degendi estigende azamattyń aty úrkip tursa bázbireýlerdiń shahar shetinen kazıno soǵyp, týra jolynan taıqýy neǵaıbyl.

Aı kóleminde iri qalalardan oıyn apparattaryn alyp tastaý naýqany júrip jatyr. Dúkenniń kireberisinde, jertólelerde kóz tartyp turatyn temir qoraptyń «qudiretine» bas qoıǵandar buǵan razy emes, árıne.

Qumar oıynǵa baspanasyn, kóligin salyp, qara jaıaý bolyp qalǵan qandastar sany az emes. Olar qomaqty qarajatty dúkenniń kireberisinde emes, qyzyldy-jasyldy kazınolardyń kassasynda qaldyrady.

Al álgi janshylyp jatqan kók qoraptardyń qomaqty qarajat jutatyn qaýqary shamaly. Ony jaǵalaıtyndardyń da áleýeti ámbege aıan. Qalta túbinde úzilýge shaq turǵan eki júz, bes júz teńgeni áýre qylady kópshiligi.

Endi bizde myna suraq: Osyndaı apparattardy janshyp, elimizdegi qumar oıynǵa degen áýesqoılyqqa qarsy «qarqyndy» jumys jasap jatyrmyz dep aýyz toltyryp aıtqan qanshalyqty durys?

Býkmekerlik keńse saıttarynda jasy kámeletke jetip úlgermegen jetkinshekterdiń akkaýnt ashyp, jeńil aqshanyń dámin tatyp júrgeni ótirik emes.

Zań bar, tyıym bar. Qolda bar múmkindiktermen jazany qatańdatsaq, qansha otbasydaǵy janjal kemip, ajyrasý faktileriniń azaıýyna qarlyǵashtyń qanatymen sý sepkendeı sebep bolar edik.