Munaıshylar ekologııalyq ústemaqy talap etýde

"Saǵyz Petroleým Kompanı" JShS-niń jumysshylary kompanııany sotqa berdi. Olar ekologııalyq ústemeaqyny talap etip otyr dep habarlaıdy Qamshy.kz aqparat agenttigi QazAqparat saıtyna silteme jasap.

Munaıshylar 2013 jyldan beri ekologııalyq aımaqta jumys isteıtini úshin ústemeaqy almaǵan. Olar sotqa aryz túsirip, is búgin qarala bastady.

"2013 jyldyń qazan aıynan beri munaı kompanııasynda jumys isteımin. Zaýytta ınjener bolyp eńbek ettim. Ujymdyq kelisimshartta 20 paıyzdyq ekologııalyq ústemeaqy tóleý mindettelgenimen, bizge eshqandaı aqsha bermedi. Jumysshylardyń árqaısysyna 1-3 mıllıon teńgege jýyq qaryz. 2016 jyly "jumysshylarǵa berilmeıdi, ol jumys berýshiniń quqyǵy" dep túsindirdi. Al 2018 jyly maýsymda jańa kelisimshart jasap, ózgertip jiberdi. Biz zańdy túrde ekologııalyq ústemeaqyny alǵymyz keledi", - deıdi JShS-niń jumysshysy Rýstam Baqytjanov.

Al Aımurat Tóremuratov kompanııada 2012 jyldan beri jumys isteıdi.

"2013-2018 jyldar aralyǵyndaǵy ekologııalyq ótemaqy berilmedi. Buǵan deıin ekologııalyq aımaqta jumys istegenderge berý kerek dep kelisse, keıin mekenjaıy ekologııalyq aımaqta turǵandarǵa ǵana ótemaqy beriledi dep ózgertti. Biz de vahtalyq ádispen jumys isteımiz. Biz de sol aımaqta isteımiz, kúkirttisýtektiń ortasynda júrgen adamdardy bólmegen durys", - dedi Aımurat Tóremuratov.

JShS men jumysshylar arasynda medıasııa tártibimen kezdesý ótken. Biraq jumysshylar kompanııa usynǵan aqshaǵa kelispeı, is sotqa joldandy. Qazir 50-den astam jumysshynyń aryzy qaralyp jatyr.

"Biz kompanııadaǵy ártúrli sharttardy, aktilerdi, mańyzdy qujattardy túsindirý jumystaryn júrgizemiz. Biraq dál osy jaǵdaıǵa baılanysty másele talqylandy dep naqty aıta almaımyn", - dedi kompanııa ókili Gaýhar Ibrasheva.