Áleýmettik sala ókilderi aýyldardy aralady

Oblys ákiminiń tapsyrmasymen Eńbek, áleýmettik qorǵaý jáne kóshi-qon komıteti, Memlekettik áleýmettik saqtandyrý qory, Áleýmettik medısınalyq saqtandyrý qory ókilderinen turatyn «Mobıldik top» qurylǵan bolatyn. Erkin áńgime qurǵan aýyl azamattary zeınetaqy jaı-kúıi, áleýmettik osal toptarǵa beriletin kómekter, densaýlyq salasy, medısınalyq saqtandyrý, jumys jaıy týraly surady.
2020 jyldan bastap densaýlyq salasyndaǵy jańa reforma – Medısınalyq saqtandyrý júıesi enedi. Buǵan deıin qymbat turatyn dıagnostıkalyq zertteýler men keıbir dári-dármek túrleri, salalyq dárigerlerge qaralý aqyly bolyp kelse, endi bul medısınalyq saqtandyrý aıasynda turǵyndarǵa tegin kórsetilmek. Bul týraly aýyl turǵyndarymen kezdesý barysynda Medısınalyq saqtandyrý qorynyń Mańǵystaýdaǵy ókili Aıgúl Dáden aıtty.
Eńbek, áleýmettik qorǵaý jáne kóshi-qon komıtetiniń Mańǵystaý boıynsha departamentiniń bólimi basshysy Ǵalym Qarataevtyń aıtýynsha, 2019 jyldyń 1 qańtarynan bastap zeınetaqy kólemi 7 paıyzǵa jáne áleýmettik járdemaqylar eń tómengi kún kóris deńgeıiniń ózgerýine baılanysty shamamen 5 paıyzǵa ósim boldy.
- Bıyl 1 shildeden bastap Elbasy N.Á.Nazarbaevtyń tapsyrmasyna sáıkes múgedek balany tárbıelep otyrǵan anaǵa nemese ákege, bala asyrap alýshyǵa, qorǵanshyǵa (qamqorshyǵa) taǵaıyndalatyn jáne tólenetin aı saıynǵy memlekettik járdemaqy kólemi 30 paıyzǵa ósedi, - deıdi Ǵ.Qarataev.
Sondaı-aq, mobıldik top músheleri áleýmettik tólem týraly keńirek aqparat aldy. «Memlekettik áleýmettik saqtandyrý qory»jergilikti basshysy Qonbaeva Nursulýdyń aıtýynsha, áleýmettik saqtandyrý qorynan eńbek etý qabiletinen aıyrylǵan jaǵdaıda, asyraýshysynan aıyrylǵan jaǵdaıda, jumysynan aıyrylǵan jaǵdaıda, júktilikke jáne bosanýǵa, jańa týǵan balany asyrap alýǵa baılanysty tabysynan aıyrylǵan jaǵdaıda, bala bir jasqa tolǵanǵa deıin onyń kútimine baılanysty tabysynan aıyrylǵan jaǵdaıda áleýmettik tólemder tólenedi.
- Qorǵa 2018 jyldyń 1 qańtarynan bastap áleýmettik aýdarymdardy esepteý obektisiniń 3,5 aýdarylady. Áleýmettik tólemniń mólsheri aı saıyn túsetin áleýmettik aýdarymnyń somasyna jáne naqty adamnyń mindetti áleýmettik saqtandyrý júıesine qatysý ótiline tikeleı baılanysty. Áleýmettik aýdarymnyń eń joǵarǵy mólsheri 42500×7=297500×3,5=10413 teńge, al eń tómengi mólsheri 42500×3,5=1488 teńge, - dep atap ótti N.Ahmetova.