"Eki kúnniń ishinde taýyp berińder": Turǵymbaev ýnıversıtet dekanyn tutqyndaýdy tapsyrdy

Ishki ister mınıstri Erlan Turǵymbaev qashqyn dekandy eki kúnniń ishinde taýyp berýge tapsyrma berdi dep habarlaıdy Qamshy.kz aqparat agenttigi Sputnik Qazaqstan saıtyna silteme jasap.

Nur Otan partııasynda ótken qoǵamdyq qabyldaý kezinde astanalyq Gúlzına Musaeva aryzdandy. Ol mınıstrdiń aldyna kelip jaıǵasqanda, Turǵymbaev qolyndaǵy qaǵazdaryna qarap otyryp: "Aqtaev boıynsha ma? Sonda myna aqshany kartochkamen tóledińiz be?", - dep surady. "Iá, kartochkaǵa, ýnıversıtetke emes, óz atyna tólep otyrdyq", - dedi Musaeva.

Mınıstr onyń aryzyn biraz oqydy da, aldymen óz orynbasarynan, sodan keıin beınebaılanys arqyly Jambyl oblystyq ishki ister departamentiniń basshylyǵynan Aqtaevtyń nege ustalmaı jatqanyn surady.

"Musaevanyń aryzy boıynsha nege shara qabyldamaısyzdar? Ýnıversıtettiń bildeı fakýltet dekany aqshany alyp, tyǵylyp júr. Ony qalaı ustaı almaı júrsizder? Osyny túsinbeı otyrmyn", - dedi Turǵymbaev.

Departament basshysynyń mindetin atqarýshy Baýyrjan Údergenovtyń aıtýynsha, qylmystyq is qozǵaldy. Dekannyń mekenjaıy boıynsha teksergende úıinde joq bolyp shyǵypty. Al uıaly telefony Almaty oblysynda júrgenin kórsetip tur eken. Mınıstr alaıaq dekandy eki kún ishinde quryqtaýdy tapsyrdy.

"Eki kúnniń ishinde maǵan ony taýyp berińder. Sizderde barlyq tehnıkalyq múmkindik bar. Ol qujatsyz júrgen kıller emes qoı. Azamattyq tulǵa, buryn sottalmaǵan. Resmı jumys isteıdi. Ondaı adamdy tabý qıyn emes. Eki kún beremin. Tabyńdar da, aqshany kimge jáne qalaı aýdarǵanyn anyqtańdar. Ol aqshany ıemdenip ketse, alaıaqtyq boıynsha is qozǵańdar da, jazaǵa tartyńdar", - dep Turǵymbaev sózin túıindedi.