Bir kólik, eki nomer. Ishki ister mınıstriniń zańǵa túkirgeni bar ma?

Jumysyna jurt jıi shaǵymdanyp, basynan daý arylmaǵan Ishki ister mınıstrliginde taǵy da shý.

Bul joly vedomstvo basshysynyń ózi nysanaǵa ilindi. Buny tegis jerden súriný degen jón bolar. Áıtpese, turǵyndarmen kezdesýge kelgen mınıstr Erlan Turǵumbaevtyń kóliginiń memlekettik nomeriniń eki túrli bolýyn qalaı jorýǵa bolady.

Oqıǵa elordada oryn aldy. Nur otan partııasynyń respýblıkalyq qoǵamdyq qabyldaýyndaǵy kezdesýden shyqqan mınıstr Lexus LX570 markaly avtokóligine otyrǵan. Mınıstr kóliginiń aldyńǵy jaǵynyń memlekettik nomeri 025 AW 01-de, arty jaǵyniki 046 KZ 01 ekenin kópshilik osy kezde baıqap qaldy. Vedomstvodaǵylar buny mınıstr 046 KZ 01 nomerli qyzmettik kólikpen júretinin, avtokólikti buǵan deıingi basshynyń paıdalanǵanyn aıtty. Úndemeı qalýdan góri birdeńe dep aıtý kerek boldy da. Áıtpese, bul keleńsizdikti ne dep túsindirsin?!

Atalǵan jaıt búgingi jıynda mınıstr málimdegen mańyzdy máselelerdiń bárin keıingi planǵa tyqsyryp, synnan arylmaı júrgen vedomstvo men onyń basshysyn uıatqa qaldyrdy. Uıat, árıne máseleniń moraldyq jaǵy ǵana. Shyn máninde bul kópe-kórneý zańsyzdyq. Zańnyń buzylmaýyn qadaǵalaıtyn organ basshysynyń óziniń zańdy aıaqasty etýi. Onsyz da bedeli belden kelip turǵan mınıstrliktiń abyroıyn aımandaı qylýy. Erteń eki túrli nomer taqqan azamattardy toqtatqanda júrgizýshi osy oqıǵany eske salsa, qarapaıym polısııa qyzmetkeri qaradan qarap basshysy úshin jerge kiretin bolar.