Prezıdent Toqaev facebook, twitter jelisi arqyly eldegi ózekti máselelerdi jedel sheshýge basty nazar aýdaryp otyr. Demek, qoǵamda joǵary bılikte, Prezıdent ákimshiliginde ózgeris bar. Al aımaqtaǵy atqaminer ákimder ózgerdi me? Álde áli de sol bıýrokratııalyq júıede ómir súrip otyr ma? Halyqtyń muń-muqtajyna, máselege, saýalǵa jedel jaýap bere ala ma?
Qamshy.kz aqparat agenttigi osy máseleni zertteý maqsatymen aımaqtaǵy 14 ákim men respýblıkalyq mańyzy bar 3 qalanyń basshysyna saýaldar jiberdi. Bizdiń saýaldarǵa dıalogtan qashpaı eń birinshi bolyp jaýap bergen Pavlodar oblysynyń ákimi Bolat Jumabekuly Baqaýov boldy.
Endi Qamshy.kz aqparat agenttigi aımaqtaǵy alańdatqan máselelerge qatysty ákimderdiń jaýabyn jarııalaı bastaıdy.
Alǵashqy sóz kezegi – Pavlodar oblysynyń ákimi Bolat Baqaýovta!
– Prezıdent Toqaev qazirgi ýaqytta ákimderge erekshe talap qoıdy. Ákimderdiń halyqqa jaqyn bolýyn eskertti. Bıýrokratııadan arylý kerek ekenin aıtty. Al Siz ákim retinde halyqqa qanshalyqty jaqynsyz?
– El Prezıdenti Qasym-Jomart Kemelulynyń tapsyrmasyn oryndaý maqsatynda oblys basshysy retinde turǵyndarmen jıi kezdesip turamyn. Ásirese, azamattardyń áleýmettik turǵydan osal toptaryn – kópbalaly analardy, múgedek bala asyrap otyrǵan otbasylaryn, qamqorshysynan aıyrylǵan jandardy qoldaý maqsatynda olarmen jıi kezdesip, talap-tilekteri men ótinishterin muqııat zerdelep otyramyn. Ár aıdyń beısenbi kúnderi azamattardy qoǵamdyq qabyldaý keńsesi jumys isteıdi. Oblys ákimi retinde qabyldaýǵa jazylǵan árbir aımaq turǵynynyń máselesimen tikeleı aınalysyp, alańdatqan máselelerdi tezirek sheshýge tyrysamyn.
– Al kópbalaly analardyń, áleýmettik jaǵynan az qorǵalǵan toptardyń baspana máselesi óńirde qalaı sheshilip jatyr?
– Kópbalaly analardy, áleýmettik jaǵynan az qorǵalǵan azamattardy baspanamen qamtamasyz etý - asa ózekti másele. Aǵymdaǵy jyldyń basynan Pavlodar oblysynda kópbalaly jáne az qamtamasyz etilgen otbasylardan shyqqan 243 otbasy turǵyn úımen qamtamasyz etildi.
– Toqaev halyqpen tikeleı baılanysty kúsheıtý úshin áleýmettik jelini paıdalanýdy usyndy. Bul oraıda siz qanshalyqty belsendisiz?
– Aqparat aǵyny joǵary qarqynmen damıtyn zamanda áleýmettik jelilerdi qoldaný asa mańyzdy. Oblys ákimniń Instagram áleýmettik jelisinde @bbakauov logınimen tirkelgen jeke akkaýntym bar. Aımaq basshysy retinde óz paraqshamda oblystyń áleýmettik-ekonomıkalyq damýyna baılanysty josparlarmen, óńirde atqarylyp jatqan mańyzdy is-sharalarmen bólisip otyramyn. Sonymen qatar, kez kelgen óńir turǵyny daırektke jazý arqyly óziniń ótinishin, tilekterin bildire alady. Azamattardyń ótinishterine tolyq ári naqty jaýaptar qaldyryp, tıisti memlekettik organdarǵa máseleni jedel túrde sheshý jóninde tapsyrma beriledi. Turǵyndardyń árbir ótinishi oblys ákiminiń jeke baqylaýynda turady.
– Qazirgi ýaqytta Almatyda, Nur-Sultanda, Arysta, Teńiz kenishinde jáne taǵy basqa óńirlerde áleýmettik teńsizdikke baılanysty ártúrli narazylyq sherýi ótkeni belgili. Al Siz óz aımaǵyńyzdaǵy jaǵdaıdan tolyq habardarsyz ba? Mundaı jaǵdaı Siz basqaryp otyrǵan óńirde de qaıtalanýy da múmkin ǵoı...
– Búgingi tańda elimizde túrli narazylyq sherýleri ótkeni belgili. Jergilikti atqarýshy organdar tarapynan halyqtyń ózekti máselelerin baqylaýda ustap, qoǵamdyq tártipti qamtamasyz etý úshin barlyq jaǵdaı jasalynýda.
– Siz úshin qazirgi ýaqytta aımaq úshin basty problema ne? Ony sheshýdiń joly qandaı?
– Halyqty tolǵandyratyn negizgi máselelerdiń biri - qorshaǵan ortany qorǵaý máselesi bolyp otyr. Osyǵan oraı 2018 jyldy Pavlodar oblysynda ekologııa jyly bolyp jarııaladyq. Nátıjesinde ekologııalyq jaǵdaıdy jaqsartý jónindegi jospar ázirlendi. Onyń ishinde atmosferany qorǵaý, bıoártúrlilik, energııa únemdeý jáne t.b. baǵyttar bar. Toqsan saıyn ónerkásip kásiporyndarynyń basshylaryn tartyp, úkimettik emes uıymdar jáne ǵalymdardyń qatysýymen dıalogtyq alańshalar uıymdastyrylady. Oblystaǵy barlyq iri kásiporyndardyń basshylary jýrnalısterge arnap brıfıngter ótkizdi. Sonymen qatar, zamanaýı ekologııalyq mobıldi postylar iske qosyldy.
Halyq nazaryndaǵy taǵy bir másele – mıgrasııa. Barlyq álemde júrip jatqan ýrbanızasııa prosesi bizdi de aınalyp ótip jatqan joq. Turǵyndardyń, ásirese jastar arasynda Nur-Sultan, Almaty syndy úlken qalalarǵa qonys aýdarý tendensııasy baıqalady. Bul máseleni sheshý maqsatynda birneshe baǵdarlamalar qolǵa alynýda. Mysaly, óńirimizde «Nurly Ertis» baǵdarlamasy júzege asyrylýda, bul baǵdarlama arqyly elimizdiń ontústik aımaqtarynan, Nur-Sultan qalasynan, Ekibastuz qalasyna 103 kópbalaly otbasy qonys aýdardy. Ekibastuz qalasyna qonys aýdarǵan barlyq otbasylarǵa páter berilip, jumyspen qamtyldy. «Serpin» baǵdarlamasy da óńirimizde 5 jyl qatarynan júzege asyrylýda. Oblysymyzǵa kelip, oqýyn bitirip, jumys jasap jatqan jastar da az emes. Bul baǵytta jumys odan ary jalǵasatyn bolady.
– Prezıdent Toqaev tamyz aıynda Ulttyq qoǵamdyq keńestiń alǵashqy otyrysy bolatynyn jarııa etti. Almaty qalasynda da ákimniń janynan qurylǵan arnaıy qoǵamdyq keńes bar. Munda negizinen turǵyndardyń talap-tilegi aıtylyp, muń-muqtajy eskeriledi. Bul oraıda siz basqarǵan ákimdik halyqtyń talabyna qanshalyqty qulaq asyp otyr?
– Jyl basynan beri 4 oblystyq, 37 qalalyq jáne aýdandyq qoǵamdyq keńesterdiń otyrysy ótkizildi, 134 normatıvtik-quqyqtyq aktileri boıynsha usynystar berildi, jeke qabyldaýda 17 ótinish berýshi qabyldandy.
Qoǵamdyq keńester jergilikti polısııa qyzmeti men basqa da memlekettik organdar basshylarynyń quqyqtyq tártipti qamtamasyz etý, halyqqa memlekettik qyzmet kórsetý jáne sybaılas jemqorlyqqa qarsy mádenıetti qalyptastyrý jónindegi esepterin qaraıdy. Otyrysqa qoǵamdyq birlestikter men buqaralyq aqparat quraldarynyń ókilderi, memlekettik organdardyń basshylary jáne sarapshylar shaqyrylady. О́tkizilgen otyrystardyń jáne memlekettik organdardyń qyzmetine monıtorıng júrgizýdiń qorytyndylary boıynsha oblys ákiminiń atyna sharalar qabyldaý úshin aımaqtyń áleýmettik-ekonomıkalyq máseleleri boıynsha qoǵamdyq keńestiń usynymdary joldanady.
Qoǵamdyq keńesterdiń jumysy týraly materıaldar arnaıy saıtta ornalastyrylady.
– Sizdiń aımaqtaǵy sheteldikter basqarýǵa alǵan óndiris oryndary men kásiporyndaǵy otandyq jumysshylardyń jaǵdaıy qalaı? Olardaǵy jalaqy aıyrmashylyǵynyń bar ekeni Sizdi alańdatpaı ma?
– 2019 jylǵy qańtar-maýsymda 16 jumys berýshiniń ótinishi boıynsha sheteldik jumys kúshin tartýǵa 55 adamǵa ruqsat berildi, onyń ishinde 2 sanat boıynsha – 15, 3 sanat boıynsha – 24, 4 sanat boıynsha – 12, korporatıvishilik aýystyrý sheńberinde – 4.
2018 jyldan aýysatyndardy eskere otyryp, aǵymdaǵy jylǵy 28 maýsymdaǵy jaǵdaı boıynsha oblysta 15 jumys berýshige berilgen 110 ruqsatnama bar, onyń ishinde qurylysta – 40 adam, taý-ken ónerkásibinde jáne karerlerdi qazýda – 29, óńdeý ónerkásibinde – 37, turý jáne tamaqtaný boıynsha qyzmetter – 3, bilim berý salasy boıynsha – 1 adam bar ekenin aıta ketken jón. Sheteldik jumys kúshin tartatyn kásiporyndardaǵy áleýmettik-eńbek jaǵdaıy turaqty.
Oblys ákimdigi eńbek zańnamasynyń, sonyń ishinde atalǵan kásiporyndarda, barynsha saqtalýyna turaqty túrde baqylaý júrgizip otyr. Ázirge eńbek jaǵdaılary, eńbek salasyndaǵy kemsitýshilik, sonyń ishinde sheteldik jáne qazaqstandyq jumyskerler arasyndaǵy eńbekaqy tóleýdegi sáıkessizdik máseleleri boıynsha aryzdar men ótinishter túsken joq.
– Ulttyq, memlekettik taqyryp máselesi óte ózekti, Bul oraıda respýblıkalyq deńgeıdegi qazaq saıttary belsendi jumys isteýde. Al Siz basqarǵan ákimshilik respýblıkalyq aýqymdaǵy qazaq saıttarymen qanshalyqty mańyzdy baılanys jasap otyr?
– Pavlodar oblysynyń ákimdigi respýblıkalyq qazaq saıttarmen tyǵyz baılanysta jumys jasaıdy. Aǵymdaǵy jyly www.dalanews.kz jáne www.elana.kz saıttarymen memlekettik tapsyrys aıasynda jumys atqarylýda.
– О́z basyńyz qazaq eliniń qazirgi damý jaıyna qalaı qaraısyz? Jańa prezıdent Toqaev bılik basyna keldi. Endi ne ózgeredi, ne ózgerýi tıis? Al Siz nemese ózińiz basqarǵan ákimshilik basqarý menedjmentinde, qoǵamda jáne halyqpen qarym-qatynasta qandaı ózgerister jasap jatyr?
– Qasym-Jomart Kemeluly Qazaqstan Respýblıkasynyń Prezıdenti laýazymyna kiriser aldyndaǵy halyqqa arnalǵan sózinde Elbasy Nursultan Ábishulynyń strategııalyq saıasatyn jalǵastyryp, «100 naqty qadam» Ult josparyndaǵy maqsat-mindetterdi júzege asyratynyn málimdegen edi. Eń aldymen ótkir áleýmettik máselelerdi sheshýmen aınalysyp, áleýmettik saıasatty jańǵyrtýmen aınalysatynyn jetkizdi. Sondaı-aq, ol qazaqstandyq kásipkerlerdi qoldap, ınvestısııalardy tartýǵa kóńil bóletinin, ár Qazaqstan azamatynyń quqyǵyn qorǵap, birtutas qoǵam qurý jolynda jumys isteıtinin aıtqan bolatyn.
Al Prezıdenttiń osy aımaqtaǵy ókili retinde óńir turǵyndarynyń áleýmettik jaǵdaıyn jaqsartyp, halyqtyń tabysyn arttyrý, áleýmettik osal toptardy turǵyn úılermen qamtamasyz etýge kúsh salamyn.
Qasym-Jomart Kemeluly memlekettik organdardyń ashyqtyǵyn qamtamasyz etip, halyq aldynda esep berip otyrýyn tapsyrdy. Sonymen qatar, Prezıdent memlekettik organdardyń shyǵyndaryn qysqartyp, bıýdjettik qarajatty únemdep ári maqsatty túrde jumsaýdy júktedi.
Jalpy alǵanda, atqarýshy bılik ókilderi bolyp tabylatyn jergilikti jerdegi ákimder bolsyn, ár túrli salada qyzmet atqaratyn basqarma basshylary bolsyn ózi basshylyq etetin mekemeniń jumysy, maqsat-mindetteri týraly qoǵam aldynda ashyq ári júıeli qyzmet atqarýy tıis dep sanaımyz.
Osyǵan oraı, Pavlodar oblysynda ár memlekettik organnyń basshysy áleýmettik jelilerde turǵyndarǵa ózi basshylyq etetin aımaq nemese sala boıynsha esep berip otyrady. Sondaı-aq, barlyq memlekettik organnyń basshysy, ákim nemese basqarma basshysy bolsyn, О́ńirlik kommýnıkasııalar qyzmeti alańynda BAQ ókilderiniń aldynda atqarylǵan jumys týraly esep berip, sol arqyly aımaq jurtshylyǵyna óziniń jumysy týraly baıandaıdy.
– Suhbatyńyzǵa rahmet!
Áńgimelesken Marjan Sábet
Qate tapsańyz, qajetti bólikti tańdap ctrl+enter basyńyz.
Usynylǵandar
Pikir qaldyrý
pikir