"Rembo", karatıst, palýan, ánshi, jazýshy". Demalystan oralǵan Túrkmenstan prezıdenti týraly ne bilemiz? (vıdeo)

Taıaýda kezekti eńbek demalysynda bolyp qaıtqan Túrkmenstan prezıdenti Gýrbangýly Berdimuhamedov ýaqytyn ádettegideı óte qyzyqty ótkizdi. Onyń el aldyna shyqpaı ketýin reseılik aqparat kózderi san saqqa júgirtip, tipti "qaıtys bolypty" degen habar da taratty. Alaıda artynsha "Arkadagtyń" din aman ekeni, demalysta bolyp, ýaqytyn óte áserli ótkizgeni anyqtaldy.

"Hronıkı Týrkmenıstana" basylymynyń habarlaýynsha, prezıdent demalysty asa belsendi ótkizgen. Myltyq atyp, boýlıng oınaǵan. Sporttyq kólikpen júıitkip, shyǵarmashylyqpen aınalysqan. Aragidik kezekti kitabyn jazý da umyt qalmaǵan.

Berdimuhamedov jan-jaqty ári kópqyrly tulǵa. Ásirese oǵash áreketteri, erekshe ermekterimen tanymal. Sport onyń ómiriniń ajyramas bir bóligi. Ol 1972 jyly klassıkalyq kúresten Ashhabadtyń, 1973 jyly atýdan el chempıony atanǵan. Atqa otyrý, velosıpedpen, sý motosıklymen serýendeý onyń súıikti isi. Bala kezinen avtosportpen shuǵyldanǵan. Karateden onynshy dan, taekvondodan qara belbeý ıegeri. "Karate-do" jalpy japon federasııasynyń qurmetti múshesi. Onyń áskerı jattyǵýlarǵa qatysqan, trenajerlik zaldarda jattyǵý jasaǵan, jelden de jyldam sporttyq mashınalarmen túrli sheberlik kórsetken vıdeolary áleýmettik jelilerde tarap, álemde túrli pikir týǵyzýda. Olardy kórgenderdiń bir toby túrkmen basshysynyń sporttyq formasyna tańdanys bildirse, biri keleke, mazaq etýde.

Aıta berse, Berdimuhamedovtyń qyzyqtary kóp. 2009 jyly Ashhabadtaǵy onkologııalyq ortalyqtyń ashylý saltanatynda qulaǵynda isigi bar naýqasqa ota jasaýǵa assıstent retinde qatysqany kóptiń esinde. Kaspıı jaǵalaýynda ornalasqan Avaza kýrortyna saparynda jumys kúnin mınıstrler men depýtattardyń qatysýymen ótken tańǵy jattyǵýdan bastaǵanyn búkil álem kórdi. Kórdi de kúldi. Oqýshylar sııaqty sapqa turǵan shendiler memleket basshysynyń istegenderin qaıtalap, voleıbol oınaýy kimdi de bolsa kúldirmeı qoımas. Berdimuhamedov taǵy án shyǵarady, ol azdaı ony ózi oryndaıdy. Kóptegen mýzykalyq aspapta oınaıdy, kerek deseńiz jylyna birneshe kitap jazady.

Sený qıyndaý, biraq ras sóz. Onyń gıtaramen aıtqan ánderin respýb­lıkalyq telearnalar merekelerde áldeneshe ret kórsetken bolatyn. Kópqyrly adamnyń kitaptary da túrli taqyryptardy qamtıdy. Aıtalyq, 2017 jyly jaryqqa shyqqan úsh kitabynyń biri sport, biri ásker, úshinshisi ishki ister organynyń jumysy jaıynda. Al 2016 jyly prezı­denttiń qalamynan shyqqan eńbekter túrkmen kilemi, mýzyka, maqal-mátel, aqaltekemen serýen jáne taǵy basqa taqy­ryptarda jazylǵan. Aqalteke demekshi, Gýrbangýly birde báıgege qatysyp, máreni bárinen buryn kesip ótken tusta sáıgúligi súrinip, ońqa-shońqa bop qulaǵany bar. Qudaı saqtap, prezıdent din aman. Quqyq qorǵaý organdary yńǵaısyz jaǵdaıdyń vıdeosy syrtqa taralyp ketpeýine qansha tyrysyp, baqqandarymen prezıdenttiń qulaǵan sátiniń beınejazbasy ǵalamtorǵa áp-sátte taralyp ketti. Túrkmenstanda ósetin emdik qasıeti bar shópter týraly jazǵan eńbegi densaýlyq saqtaý salasynda oqýlyq retinde qoldanylatynyn da bile júrgeısizder.

Súıikti túsi aq. Sondyqtan 2015 jyly elge qara tústi avtomobılderdi ákelýge tyıym salynǵan. Shendiler qara tústi kólikterinen túsip, birden appaq qardaı kólikke mindi. Kóshede qara ıa qaraǵa jaqyn tústes kólik júrse, oǵan birden aıyppul salynyp, aq, ashyq túske boıaıtyndyǵy týraly qolhat alynyp bir-aq jiberiledi eken.