Kópbalaly ana alaıaq bolyp shyqty

Atyraý qalasynda alaıaqtyq jasaǵan kópbalaly anaǵa sot úkimi shyqty. Belgili bolǵandaı, kópbalaly ana dál osyndaı áreketi úshin buryn sotty bolypty dep jazady Qamshy.kz aqparat agenttigi.

Tergeý barysynda áıeldiń Atyraý qalasynda «QazMunaıGaz» UK» AQ-na jumysqa turǵyzamyn dep 13 adamdy sazǵa otyrǵyzyp ketkeni anyqtaldy. Olardyń árbirinen 50 myń teńgeden aqsha alǵan. Al qalǵan 20 myń teńgesin «jumysqa kirýi tıis adamdar» vahtadan qaıtqasyn berýge kelisken. Biraq qolyna aqsha tıgen áıel bergen ýádesin umytyp ketken.

Áıel adam osy ýaqytqa deıin alaıaqtyq jasaǵany úshin eki jyl bas bostandyǵynan aıyrylǵan eken.

Atyraý qalasynyń №2 soty áıeldi qylmys jasaǵany úshin QR QK «Alaıaqtyq» babyna sáıkes úsh jylǵa bas bostandyǵynan aıyrdy.

«Sot úkim shyǵararda áıel adamnyń jasaǵan isine ókinetinin jáne kámelet jasyna tolmaǵan alty balasy bar ekenin eskerdi. Sondaı-aq, ol alaıaqtyq jolmen alǵan aqshalaryn óz ıesine qaıtarýy tıis», - dep málimdedi sottyń baspasóz qyzmeti.