Jambyl oblysynda oń ózgerister óte kóp

Jambyl oblysynda densaýlyq saqtaý salasynda aǵymdaǵy jyly qalyp otyrǵan 65 eldi mekendi alǵashqy medısınalyq kómek kórsetetin nysandarmen qamtý máselesi 100 paıyzǵa sheshiledi. Bul týraly oblys ákimi  Asqar Myrzahmetov oblystyq máslıhattyń kezekten tys ótken sessııasynda bergen esebinde aıtty.

Myrzahmetovtyń málimetinshe, oblystaǵy ólim-jitim kórsetkishi (oblys – 6,78 promıl) ortasha respýblıkalyq ortasha kórsetkishten (7,39 promıl) tómen. Onyń ishinde ana ólimi de tómendep otyr.

«Jedel medısınalyq kómektiń qoljetimdiligin jaqsartý úshin 44 sanıtarlyq avtokólik satyp alynyp jatyr. Taraz qalasynda jedel járdem qyzmetin baǵalaıtyn «Kómek» aqparattandyrý júıesi engizildi, aýdandarǵa 1 tamyzǵa deıin engiziledi», – dedi oblys ákimi.

Sonymen qatar, Asqar Myrzahmetov óz esebinde oblystaǵy kóptegen on ózgeristerdi aıtty.

«Jastar jylyna oraı «Jastar alleıasy» ashyldy. Onda birneshe nysandar boı kóterdi. Onyń biri «Jastar qabilet ortalyǵy».

«Qamqor» volonterlik-qaıyrymdylyq jobasy qolǵa alyndy. 2 myńǵa jýyq eriktiler derekqory jasaldy. Taraz qalasynda 3 qaıyrymdylyq dúkeni ashyldy.

(Atalǵan dúkender 977 otbasyǵa 4 tonnaǵa jýyq kıim-keshek úlestirip, 609 otbasyǵa 3,2 mıllıon teńgege azyq-túlikpen kómek kórsetildi.)

Búginde «Qamqordyń» 30 múshesi Arys qalasyn qalpyna keltirý jumystaryna da kómek kórsetýde.

Jańa bıznes-ıdeıalardy iske asyrý úshin oblystyq bıýdjetten 300 mıllıon teńge, al respýblıkalyq bıýdjetten 166 mıllıon teńge grant bólinip, 466 jastyń qujaty qaralýda.

Osy jyly 11 myń jas jumyspen qamtýdyń belsendi sharalaryna tartý josparlansa, esepti kezeńge 7 myńǵa jýyq (62 paıyz) jas tartyldy.

«Dıplommen aýylǵa» baǵdarlamasy aıasynda 344 mamanǵa 61 mıllıon teńge kóterme járdemaqy, 123 mamanǵa turǵyn úı satyp alýǵa 445 mıllıon teńge nesıe berildi.

Sport salasynda da jetistigimiz az emes. Oblystyń 893 sportshysy Ulttyq qurama komandasy músheligine endi.

Jarty jylda halyqaralyq jáne respýblıkalyq jarystarda 267 altyn, 196 kúmis, 233 qola medaldaryn ıelendi.

Atap aıtsaq, dzıýdodan Eldos Smetov Antalııa jáne Býdapesht qalasynda ótken Álemdik Gran-prı týrnıriniń jeńimpazy atansa, Neapol qalasynda ótken Ýnıversıada oıyndarynda Qyryqbaı Ǵalymjan altyn medaldi ıelendi.

Taraz qalasyndaǵy «Jastar» stadıony kúrdeli jóndeýden ótkizilýde. Tarazda 3 dene shynyqtyrý keshenin salýǵa JSQ daıyndaldy.

Turǵyndardyń sportpen shuǵyldanýyna aýlalarda jáne saıabaqtarda bıyl 210 sport alańshasyn salý josparlansa, búginge onyń 25-i qoldanysqa berildi, – dedi Asqar Isabekuly.

Qýanysh Keýilimjaı